Germaniya bir oydan buyon Ukrainaga 9 milliad yevrolik yordam paketi taqdim etilishiga to‘sqinlik qilmoqda. Bu haqda Corriere della Sera gazetasi Kiyev va Bryusseldagi manbalariga tayanib yozmoqda.
Yordam Yevropaning o‘z qarz majburiyatlari hisobidan Kiyevga 25 yildan keyin so‘ndiriladigan deyarli foizsiz kreditlar taqdim etilishini ko‘zda tutadi. Germaniya — ushbu yevroobligatsiyalarning eng yirik kafili. Germaniya moliya vaziri Kristian Lindner Ukrainaga ko‘mak berilishiga qarshi chiqyapti, u Bryussel Ukrainani deb umumyevropa qarziga murojaat qilayotganidan norozi. Hozircha Lindner 1 milliard yevrolik birinchi transhga rozi bo‘ldi, u Kiyevga iyulgacha o‘tkazib berilishi kerak edi.
Yevroittifoq mamlakatlari Ukrainaga 9 milliard yevrolik moliyaviy ko‘mak berishni iyun oxirida ma’qullagan edi.
Berlinning xatti-harakatlari Ukraina prezidenti Vladimir Zelenskiyni Germaniyadagi elchi Andrey Melnikni ishdan bo‘shatishga undagan omillardan biri bo‘lgan bo‘lishi mumkin, deb yozadi nashr. Yana bir sabab sifatida gazeta Zelenskiyning Germaniya hukumati “Shimoliy oqim” gaz quvuri orqali Rossiya gazi yetkazib berilishini qayta tiklash uchun Rossiyaga qarshi sanksiyalarning bir qismini bekor qilishidan xavfsirayotganini aytmoqda.
Shu bilan birga, deb yozadi Corriere della Sera, Germaniyaning Ukraina uchun yordam paketidan noroziligi, aftidan, gaz yetkazib berish va Berlinning “Moskvaga xushomod qilish”ga urinishlari bilan bog‘liq emas.
Ayni vaqtda Kiyev da’vo qilishicha, unga 5 milliard yevro miqdorida yordam kerak, va sentabrda Ukraina 900 million yevrolik tashqi qarzi bo‘yicha defolt e’lon qilishi istisno etilmayapti, deb yozadi gazeta.
Iyun o‘rtalarida Rossiyaning “Gazprom”i “Shimoliy oqim” gaz quvuri orqali Germaniyaga gaz yetkazib berish hajmini dastlab 167 million kub metrdan 100 milliongacha, keyinroq 67 million kub metrgacha qisqartirdi. Kompaniya “Shimoliy oqim” uchun Germaniyaning Siemens Energy kompaniyasi gaz turbinalari yo‘qligi tufayli shunday qarorga kelganini ma’lum qildi (u Monrealda ta’mirlanmoqda). Uning Rossiyaga qaytarilishi Kanada tomonidan Ukrainadagi harbiy harakatlar tufayli kiritilgan sanksiyalarni murakkablashtirdi.
Bundan tashqari, Rossiya 11-iyuldan 21-iyulgacha quvur orqali gaz yuborishni rejali profilaktika uchun to‘xtatib qo‘yadi. Germaniya Rossiya tomoni shundan keyin gazni umuman to‘xtatib qo‘yishidan xavfsiramoqda.
8-iyun kuni Reuters agentligi o‘z manbalariga tayanib, “Shimoliy oqim” uchun dvigatelni qaytarish haqida qaror qabul qilinib bo‘lganini ma’lum qildi. Turbinani dastlab Germaniyaga yuborish rejalashtirmoqda, u yerdan esa u “Gazprom”ga beriladi, bu Kanadaga sanksiyalarni buzmaslik imkonini beradi.
Kreml Moskva energiya manbalaridan “siyosiy bosim o‘tkazish uchun qurol sifatida” foydalanayotganiga oid “har qanday imo-ishoralar” va bayonotlarni rad etmoqda. Rossiya prezidenti matbuot kotibi Dmitriy Peskov da’vo qilishicha, Rossiya o‘z zimmasiga olgan majburiyatlarini bajarmoqda va “hamon Yevropaning to‘liq energetik xavfsizligini kafolatlashga qodir”.
Mavzuga doir:
Izoh (0)