Fransiya hukumati Rossiyadan gaz import qilishni to‘liq to‘xtatishga tayyorlanmoqda, dedi moliya vaziri Bruno Le Mer. Bu haqda Reuters xabar berdi.
“Rossiya gazidan butunlay voz kechishni haqiqat deb hisoblayman va biz bunday ssenariyga tayyorlanishimiz kerak”, — dedi vazir Rencontres Economiques iqtisodiy forumida.
Uning qo‘shimcha qilishicha, ushbu ssenariyning amalga oshishi ehtimoli juda katta va buni oldindan ko‘ra olmaslik mas’uliyatsizlik hisoblanadi.
Le Merning so‘zlariga ko‘ra, birinchi navbatda, hukumat uy xo‘jaliklari va korxonalar tomonidan gaz iste’molini kamaytirish, so‘ngra suyultirilgan tabiiy gazni qabul qilish va qayta gazlashtirish uchun zarur infratuzilmani qurish masalasini ko‘rib chiqmoqda. Rasmiylar, shuningdek, ba’zi kompaniyalar energiyani tejash uchun ishlab chiqarishni kamaytirishga majbur bo‘lishini tan olmoqda.
Fransiya o‘z gazining taxminan 17 foizini Rossiyadan oladi, bu ba’zi qo‘shnilariga qaraganda kamroq, ammo hukumat favqulodda vaziyat rejasini tayyorlamoqda. Gap shundaki, Rossiyadan yonilg‘i yetkazib berishning to‘xtatilishi Parij uchun jiddiy muammolarni keltirib chiqaradi, chunki yadroviy reaktorlarning katta qismi hozir teznik xizmatda va ulardan foydalanishning imkoni yo‘q.
Izoh (0)