AQSH prezidenti Jo Bayden The Washington Post gazetasiga yozgan maqolasida ko‘pchilik uning Saudiya Arabistoniga bo‘lajak safarini tanqid qilayotgan bo‘lsa-da, bu Rossiyaga qarshi turish nuqtayi nazaridan muhim ekanini qayd etdi.
“Prezident sifatidagi vazifam mamlakatimizni kuchli va xavfsiz qilishdir. Biz Rossiya agressiyasiga qarshi turishimiz, Xitoydan o‘zib ketish uchun o‘zimizni eng yaxshi holatga qo‘yishimiz hamda dunyoning muhim mintaqasida barqarorlikni oshirish uchun harakat qilishimiz kerak”, — deb yozadi u.
Buning uchun, prezidentning so‘zlariga ko‘ra, Qo‘shma Shtatlar ushbu maqsad natijalariga ta’sir ko‘rsatishi mumkin bo‘lgan davlatlar bilan bevosita aloqada bo‘lishi kerak. Ulardan biri Saudiya Arabistoni, deyiladi maqolada.
Baydenning Yaqin Sharqqa safari 13-iyuldan boshlanadi va 16-iyulgacha davom etadi. AQSH prezidenti Isroil, Iordan daryosining G‘arbiy sohili va Saudiya Arabistoniga tashrif buyuradi. Reuters xabariga ko‘ra, u Saudiya qiroli Salmon bin Abdulaziz al-Saud va valiahd shahzoda Muhammad bin Salmon al-Saud bilan uchrashadi.
Amerika rahbarining so‘zlariga ko‘ra, safar “mintaqa uchun hayotiy muhim vaqtda bo‘lmoqda va Amerika manfaatlarini ilgari surishga yordam beradi”. Xususan, uning yozishicha, Yaqin Sharq ta’minot zanjirlarini saqlab qolish uchun muhim ahamiyatga ega, mintaqadagi energiya resurslari Rossiyaning Ukrainadagi bosqiniga javoban joriy etilgan cheklovlar oqibatlarini yumshata oladi.
Izoh (0)