AQSH Davlat kotibi Entoni Blinken Yaponiya sobiq bosh vaziri Sindzo Abening fojiali o‘limi munosabati bilan Yaponiya yetakchilari va xalqiga hamdardlik bildirish uchun kelasi hafta Yaponiyaga tashrif buyuradi. Bu haqda Davlat departamentining bayonotiga tayanib, “Interfaks” xabar berdi.
“Kotib Blinken Tokioga safar qilib, sobiq bosh vazir Sindzo Abe vafoti munosabati bilan yapon xalqiga hamdardlik bildiradi va Yaponiyaning yuqori martabali rasmiylari bilan uchrashadi”, — deyiladi departament matbuot kotibi Ned Praysning bayonotida.
Diplomatning qayd etishicha, “AQSH—Yaponiya ittifoqi Hind—Tinch okeani mintaqasida tinchlik va barqarorlikning tamal toshi hisoblanadi, u hech qachon hozirgidek kuchli bo‘lmagan”.
Abening dafn marosimi 12-iyulga belgilangan. U 8-iyul kuni mitingda nutq so‘zlayotgan paytda otib ketildi va shifokorlarning urinishlariga qaramay vafot etdi.
Blinken hozir Tailandda bo‘lib turibdi. U Indoneziyaning Bali orolidagi G20 mamlakatlari tashqi ishlar vazirlarining yig‘ilishida ishtirok etganidan so‘ng Tailandga tashrif buyurgan.
Eslatib o‘tamiz, 8-iyul kuni Shavkat Mirziyoyev Sindzo Abe vafoti munosabati bilan Yaponiya imperatori va bosh vaziriga hamdardlik yo‘lladi.
Izoh (0)