AQSH olimlari aniqlashicha, Portugaliya va Ispaniyaning ba’zi tumanlari so‘nggi ming yillikdagi eng qurg‘oqchil hududlarga aylangan, deb yozadi Tengrinews.
Tadqiqotchilar bu hodisani iqlim o‘zgarishi natijasida yuzaga kelgan yuqori atmosfera bosimi bilan izohladi. So‘nggi 1200 yil ichidagi iqlim modellaridan foydalanib o‘tkazilgan tadqiqot shuni ko‘rsatdiki, qariyb 200 yil avval, insoniyat faoliyati natijasida issiqxona gazlari bilan ifloslanish osha boshlagan paytda yuqori bosim tizimi o‘sishni va kattaroq maydonlarni qamrab olishni boshlagan. U XX asrda global isish tufayli yanada keskinroq kengayib ketdi.
Olimlar jamoasi, shuningdek, Portugaliya stalagmit (g‘or tagida hosil bo‘lib, yuqoriga o‘sadigan konussimon oqiq-tomchi hosila)larda yuzlab yillar davomida saqlanib qolgan yog‘ingarchiliklar miqdori belgilarini ham o‘rganib chiqib, G‘arbiy Yevropada ob-havoga va iqlim tendensiyalariga ta’sir o‘tkazuvchi Azor orollari balandligi oshib borgani sari, O‘rtayer dengizidagi qish mavsumi quruqlashganini aniqladi.
Tadqiqotda keltirilgan prognozlarga ko‘ra, yog‘in miqdori asr oxiriga kelib, yana 10—20 foizga kamayishi, Pireney yarim orolida esa uzum yetishtirish uchun yaroqli maydon chorak qismga kichrayishi va 2050-yilgakelib, o‘tkir suv tanqisligi tufayli potensial tarzda yo‘q bo‘lib ketishi mumkin, bu esa, mualliflar qayd etishicha, iberiyaliklar qishloq xo‘jaligini “Yevropadagi eng zaiflaridan biri”ga aylantirib qo‘yadi.
Eslatib o‘tamiz, Italiya hukumati 4-iyul, dushanba kuni mamlakat shimolidagi qurg‘oqchilikdan aziyat chekayotgan aksariyat viloyatlarda favqulodda vaziyat rejimini e’lon qildi. Iyun oxirida sohaga tegishli CIA uyushmasi Italiyada so‘nggi 70 yil ichidagi eng kuchli qurg‘oqchilik mamlakat qishloq xo‘jaligiga 3 milliard yevro miqdorida zarar yetkazishi haqida ogohlantirgan edi. Yomg‘irlar yo‘qligi va 40 darajali jazirama bu mavsumda qishloq xo‘jaligi ekinlarining 30—40 foizini xavf ostida qoldirmoqda.
Izoh (0)