АҚШ олимлари аниқлашича, Португалия ва Испаниянинг баъзи туманлари сўнгги минг йилликдаги энг қурғоқчил ҳудудларга айланган, деб ёзади Tengrinews.
Тадқиқотчилар бу ҳодисани иқлим ўзгариши натижасида юзага келган юқори атмосфера босими билан изоҳлади. Сўнгги 1200 йил ичидаги иқлим моделларидан фойдаланиб ўтказилган тадқиқот шуни кўрсатдики, қарийб 200 йил аввал, инсоният фаолияти натижасида иссиқхона газлари билан ифлосланиш оша бошлаган пайтда юқори босим тизими ўсишни ва каттароқ майдонларни қамраб олишни бошлаган. У ХХ асрда глобал исиш туфайли янада кескинроқ кенгайиб кетди.
Олимлар жамоаси, шунингдек, Португалия сталагмит (ғор тагида ҳосил бўлиб, юқорига ўсадиган конуссимон оқиқ-томчи ҳосила)ларда юзлаб йиллар давомида сақланиб қолган ёғингарчиликлар миқдори белгиларини ҳам ўрганиб чиқиб, Ғарбий Европада об-ҳавога ва иқлим тенденцияларига таъсир ўтказувчи Азор ороллари баландлиги ошиб боргани сари, Ўртаер денгизидаги қиш мавсуми қуруқлашганини аниқлади.
Тадқиқотда келтирилган прогнозларга кўра, ёғин миқдори аср охирига келиб, яна 10—20 фоизга камайиши, Пиреней ярим оролида эса узум етиштириш учун яроқли майдон чорак қисмга кичрайиши ва 2050 йилгакелиб, ўткир сув танқислиги туфайли потенциал тарзда йўқ бўлиб кетиши мумкин, бу эса, муаллифлар қайд этишича, иберияликлар қишлоқ хўжалигини «Европадаги энг заифларидан бири»га айлантириб қўяди.
Эслатиб ўтамиз, Италия ҳукумати 4 июль, душанба куни мамлакат шимолидаги қурғоқчиликдан азият чекаётган аксарият вилоятларда фавқулодда вазият режимини эълон қилди. Июнь охирида соҳага тегишли CIA уюшмаси Италияда сўнгги 70 йил ичидаги энг кучли қурғоқчилик мамлакат қишлоқ хўжалигига 3 миллиард евро миқдорида зарар етказиши ҳақида огоҳлантирган эди. Ёмғирлар йўқлиги ва 40 даражали жазирама бу мавсумда қишлоқ хўжалиги экинларининг 30—40 фоизини хавф остида қолдирмоқда.
Мавзуга доир: Иқлим ўзгариши натижасида Марказий Осиё чўлга айланмоқда
Изоҳ (0)