Buyuk Britaniya bosh vaziri Boris Jonson ikki vazirning iste’foga chiqishi munosabati bilan parlament qo‘mitalari vakillari bilan ikki soatlik suhbatda qatnashadi. Majlis yakunlariga ko‘ra Jonsonning ushbu lavozimdagi kelajagi borasida qaror chiqariladi. Bu haqda Reuters xabar berdi.
Qayd etilishicha, Britaniya bosh vazirining hukmron Konservativ partiyadagi tobora ko‘proq maslakdoshlari lavozimlarini tark etishni istayapti. Jonsonning o‘zi esa sobiq ta’lim vazirini moliya vazirligiga rahbar qilib, o‘z lavozimida qolishni rejalashtirayotganini ko‘rsatib berdi.
“Biz uni (Jonsonni) Dauning-stritdan oyoqlarini tipirchilatayotgan, baqirayotgan holatda olib ketishimizga to‘g‘ri keladi, shekilli. Lekin agar shunday qilishimiz kerak bo‘lsa, qilamiz”, — dedi Konservativ partiyaning o‘z ismini oshkor qilmagan deputati.
Eslatib o‘tamiz, moliya vaziri Rishi Sunak hamda sog‘liqni saqlash vaziri Sajid Javid iste’fo berdi. Javid bundan buyog‘iga vazirlik vakolati doirasidagi ishlarni vijdonan bajara olishiga shubha uyg‘onganini ma’lum qildi. Oradan hech qancha vaqt o‘tmay Sunakning ham iste’fo bergani oydinlashdi.
“Jamoatchilik hukumat ishining belgilangan tartibda ketishini kutadi va bu adolatli, jiddiy va haqiqatga mos. Ehtimol men ushbu lavozim mening vazir sifatidagi oxirgi rahbarlik ishim ekanini tan olayotgandirman, lekin mazkur standartlar uchun kurashish zarurligini yaxshi tushundim, shuning uchun ham iste’foga chiqyapman”,— deya yozgan Rishi Sunak Twitter’da (Reuters iqtibosi).
Shuningdek, Konservativ partiya raisining o‘rinbosari Bim Afolami, Buyuk Britaniyaning Marokashdagi savdo vakili Endryu Marrison va Britaniya vazirlarining parlamentdagi uch nafar shaxsiy kotiblari ham iste’fo berdi.
Buyuk Britaniyaning muxolifatchi Leyboristlar partiyasi yetakchisi Kir Starmer Jonsonning hukumati “qulayotgani”ni aytdi. Liberal demokratlar partiyasi yetakchisi Ed Deyvi Jonsonni zudlik bilan iste’foga chiqishga chaqirdi.
Iyun boshida Jamoatchilik palatasining Konservativ partiyadan chiqqan a’zolari Boris Jonsonning partiya yetakchisi va mamlakat bosh vaziri lavozimida faoliyatini davom ettirishi bo‘yicha ovoz berish o‘tkazdi. Uning natijalariga ko‘ra, Jonson lavozimini saqlab qoldi.
Jonsonning tanqidchilari fikricha, koronavirus tufayli lokdaunlar va cheklovlar avjiga chiqqan paytda hukumat a’zolari tomonidan uyushtirilgan ziyofatlarni uning iste’foga chiqishi uchun sabab qilib keltirmoqda.
O‘tgan hafta Konservativ partiyaning Jamoatchilik palatasidagi bosh tashkilotchisi o‘rinbosari Kris Pincher shilqimliklar tufayli iste’fo bergan edi. Shundan keyin Jonson Pincher avval ham shilqimliklar haqidagi parlament surishtiruvi ishtirokchisi bo‘lganiga qaramay, uni yangi lavozimlarga tayinlagani uchun kechirim so‘radi.
Izoh (0)