Ўзбекистонда урбанизация (шаҳарлашув) ривожланса, уйларни иситиш жуда арзонга тушади. Бу ҳақда Энергетика вазирлиги электр энергетикаси тармоғини ислоҳ қилиш лойиҳаси директори ўринбосари Баҳромбек Умарбеков маълум қилди, дея хабар бермоқда «Дарё» мухбири.
Баҳромбек Умарбеков Тошкент шаҳрида ўтказилган энергетика форуми доирасида журналистларга берган интервьюсида урбанизациянинг энергетика соҳасига таъсири ҳақида гапирди.
«Обод қишлоқ» дастури натижасида қишлоқлар кенгайиб кетди. Урбанизация ўсмади, яхши бўлмади. Урбанизацияга энергетика нуқтаи назаридан қаралса, одамлар жипсроқ шаҳарларда яшаса, марказий иситиш тизимларига уланади. Шунда бу тизимдаги буғ текинга тушади. Чунки электр ишлаб чиқарилганда, буғ ўзи шундоқ ҳам чиқадиган нарса. Буғ текинга тушгани учун уйни иситиш ҳам жуда арзон бўлади. Натижада шаҳарларни иситиш анча арзонга тушади. Урбанизацияни йўлга қўйсак кўмирда уйини иситувчи хонадонлар сони анча камаяди. Ундан кейин ривожланишларимиз яхши бўлиб кетса, ҳозир уйни иситиш бўйича янги технологиялар чиқяпти. Улар кўмирсиз ва газсиз ҳам уйни исита олади. шулардан фойдаланиш аста-секин йўлга қўйилади. Урбанизация стратегиясини ишлаб қичишга Иқтисодий тараққиёт ва камбағалликка қарши курашиш вазирлиги масъул», – деди у.
Аввалроқ Баҳромбек Умарбеков «ўзбекларнинг пулига муҳтож эмасмиз, пул море», деган сўзларига изоҳ берганди.
Изоҳ (0)