Polsha bosh vaziri Mateush Moravetskiy mamlakat Belarus bilan chegarada to‘siq qurib bitirganini ma’lum qildi, deb yozadi “Kommersant”. Devorni qurish Yaqin Sharqdan kelgan qochqinlarning Belarus chegarasi orqali respublika hududiga o‘tishga ko‘p marta urinishlaridan keyin yanvar oxirida boshlangan edi.
Moravetskiy ta’kidlashicha, Polsha hukumati to‘siqni, va’da qilinganidek, yoz boshigacha qurib bitkazishga ulgurgan.
“Siyosiy jihatdan sodir bo‘lishi mumkin bo‘lgan hodisalarni oldindan ko‘ra bilganimiz sharofati bilan e’tiborimizni hozir o‘z suverenitetini himoya qilish uchun kurashayotgan Ukrainaga yordam berishga qarata olamiz”, — dedi Polsha bosh vaziri brifingda chegaradagi devor afzalliklari haqida gapirar ekan. Uning fikricha, Polsha-Belarus chegarasida Aleksandr Lukashenko tashabbusi bilan yuzaga kelgan inqiroz Ukrainada nizo yaqinlashib kelayotganining birinchi belgisi bo‘lgan.
Avvalroq devor uzunligi 186 km (chegaraning jami uzunligi 418 km), balandligi esa 5 metr bo‘lishi rejalashtirilgan edi. Loyiha qiymati 370 million dollarga baholangan, konstruksiyani harakat datchiklari va tungi kuzatuv kameralari bilan jihozlash ko‘zda tutilgan edi.
2021-yil avgustidan buyon Polsha va Belarus chegarasida Yaqin Sharq mamlakatlaridan chiqqan qochqinlar paydo bo‘la boshladi. Migratsiya inqirozi o‘tgan yil 8-noyabrda kuchaydi, o‘shanda qariyb 2 ming nafar noqonuniy muhojir kuch bilan Polshaga kirishga urindi. Litva, Latviya va Polsha Belarus hukumatini, xususan, respublika prezidenti Aleksandr Lukashenkoni inqirozli vaziyatni yuzaga keltirishda aybladi.
Mavzuga doir:
Izoh (0)