29 июнь куни Ашхободда Каспийбўйи давлатлари раҳбарларининг VI саммити бўлиб ўтди. Тадбирда иштирок этиш учун Туркманистонга Россия президенти Владимир Путин, Озарбайжон президенти Илҳом Алиев, Қозоғистон раҳбари Қосим-Жўмарт Тўқаев ва Эрон раҳбари Иброҳим Раисий келди.
Меҳмонлар Туркманистон президенти Сердар Бердимуҳамедов ва шу куни таваллудининг 65 йиллигини нишонлаётган унинг отаси, собиқ президент, парламент юқори палатасининг амалдаги раиси Гурбангули Бердимуҳамедов билан учрашди.
Томонлар турли соҳалардаги ҳамкорлик муваффақиятлари ҳақида умумий иборалар билан алмашдилар.
«ТАСС» ахборот агентлигининг хабар беришича, Путинни аэропортда Туркманистон ташқи ишлар вазири Рашид Мередов кутиб олган. Россия президенти саммит майдонига Россия байроғи ўрнатилган қора «Aurus»да борган.
Икки ҳафта олдин Туркманистон Россияда ишлаб чиқарилган илк оқ рангли Aurus Senat Limousine зирҳли машинасини сотиб олгани хабар қилинган эди. Сердар Бердимуҳамедов 10 июнь куни Россияга ташрифи чоғида айнан шу автомобилдан фойдаланган.
«РБК» нашрининг хабар беришича, юбилей шарафига Путин Гурбангули Бердимуҳамедовга иккита қилич, шахмат тўплами ҳамда от устидаги чавандоз ҳайкалини совға қилган.
Россия раҳбари матбуот котиби Дмитрий Песковнинг сўзларига кўра, шахмат златоустлик усталар томонидан, «Қайтиб келаётган чавандоз» ҳайкали эса машҳур петербурглик ҳайкалтарош Лансеренинг невараси томонидан яратилган. Песков қиличлар ҳақида гапирар экан, улардан бири эски, иккинчиси янги эканини айтди.
Қозоғистон раҳбари Тўқаев Гурбангули Бердимуҳамедовни «Қозоғистон—Туркманистон муносабатларини мустаҳкамлашга қўшган салмоқли ҳиссаси учун» Қозоғистон Республикасининг олий давлат мукофоти – «Олтин Қиран» ордени билан тақдирлади.
29 июнь куни Шавкат Мирзиёев Гурбангули Бердимуҳамедов билан телефон орқали мулоқот қилган. Суҳбат аввалида давлат раҳбари Гурбангули Бердимуҳамедовни 65 ёшга тўлгани билан самимий қутлаб, унга мустаҳкам соғлик, бахт-саодат ва муваффақиятлар, биродар Туркманистон халқига тинчлик-осойишталик ва равнақ тилаган.
Изоҳ (0)