Qozog‘iston prezidenti Qosim Jo‘mart To‘qayev respublika harbiy xizmatchilarini tinchlikparvarlar sifatida Markaziy Afrika Respublikasi (MAR), Kongo, Mali va Livanga yuborishni taklif qildi, uning taklifini parlament yig‘ilishida mudofaa vaziri Ruslan Jaksilikov o‘qib eshittirdi, deb yozadi “RBK”.
“Qurolli kuchlarning jami 430 harbiy xizmatchidan iborat tinchlikparvar kontingentini Markaziy Afrika Respublikasini barqarorlashtirish bo‘yicha ko‘p profilli majmuali missiyada, ikkinchidan, BMTning Kongo Demokratik Respublikasidagi barqarorlashtirish missiyasida, uchinchidan — Malidagi vaziyatni barqarorlashtirish bo‘yicha ko‘p profilli majmuali missiyada va to‘rtinchidan, Livandagi muvaqqat kuchlar missiyasida ishtirok etish uchun yo‘naltirish taklifini kiritaman”, — deyiladi hujjatda.
Jaksilikovning so‘zlariga ko‘ra, BMT rahbariyati Qozog‘iston tinchlikparvar kuchlarining tashkilot missiyalaridagi soni oshishini qo‘llab-quvvatlashga tayyor, shuningdek, respublika harbiylarining shaylik darajasiga yuqori baho berdi. Mudofaa vaziri qo‘shimcha qilishicha, Qozog‘iston shtab ofitserlari va harbiy kuzatuvchilar sifatida alohida harbiy xizmatchilarni ham, shuningdek, BMT missiyalarida eng talabgir bo‘lgan ixtisoslashgan bo‘linmalar, xususan, harbiy politsiyaning piyodalar, tibbiy, razvedka, muhandislik bo‘linmalarini ham ajratishga tayyor. Uning qayd etishicha, Qozog‘istondan BMT Qurolli kuchlariga beshta bo‘linma kirishi mumkin, biroq ular birdaniga emas, missiyaga shaylik baholanganidan keyin so‘rov bo‘yicha yuboriladi.
Qozog‘iston Mudofaa vaziri ma’lum qilishicha, bugungi kunda BMTning G‘arbiy Sahroi Kabir missiyasida respublikaning olti nafar harbiy xizmatchisi qatnashmoqda, tashkilotning muvaqqat kuchlari tarkibiga esa to‘qqiz nafar qozog‘istonlik harbiy xizmatchi kiradi.
Parlamentning ikkala palatasi deputatlari ham prezidentning taklifini yoqlab ovoz berdi.
Ayni paytda BMTning Livandagi missiyasi kuzatuv xususiyatiga ega bo‘lib, uning ishtirokchilari jangovar harakatlarning tugatilishini kuzatib boradi.
BMTning Kongodagi missiyasi bevosita jismoniy zo‘ravonlik xavf soluvchi tinch fuqarolar, gumanitar personal va huquq muhofazachilari himoyasini ta’minlaydi va hukumatga tinchlikni mustahkamlash va barqarorlashtirish bo‘yicha ishda ko‘maklashadi.
Malidagi missiya respublikaning o‘tish davridagi rahbariyatini davlat hokimiyatini qayta tiklashda va erkin, keng qamrovli va tinch saylovlarga tayyorlanishda qo‘llab-quvvatlaydi, shuningdek, gumanitar yordam taqdim etilishi va ko‘chirib yuborilgan fuqarolar qaytishi uchun sharoitlarni ta’minlaydi. MARdagi missiya ham shunga o‘xshash faoliyatni olib boradi.
Izoh (0)