O‘zbekiston hududiga Turkmaniston orqali Eron hududlaridan issiq havo kirib kelishi sababli havo harorati 45 daraja Selsiygacha ko‘tarilishi to‘g‘risida xabar berilgandi. “O‘zbekiston temir yo‘llari”ning ma’lum qilishicha, bu kabi issiq haroratda harakat xavfsizligini ta’minlash maqsadida poyezdlarning barcha turlari (yuk va yo‘lovchi) tezligiga cheklov belgilangan.
Shuningdek, “O‘ztemiryo‘lyo‘lovchi” AJ tomonidan yo‘lovchi vagonlarni yangilash hamda sovitish tizimi bilan jihozlash borasida ishlar olib borilmoqda. Hozirgi kunda yo‘lovchilarga xizmat ko‘rsatishga mo‘ljallangan jami vagonlardan:
- 6 ta yuqori tezlikda harakatlanuvchi “Afrosiyob” elektropoyezdi (har biri 11 ta vagondan (umumiy 66 ta vagon) tashkil topgan va to‘liq sovitish tizimi bilan jihozlangan);
- 5 ta tezyurar (“Sharq”, “Nasaf”, “O‘zbekiston”) yo‘lovchi poyezdlar mavjud bo‘lib, umumiy 46 ta vagondan tashkil topgan, barcha vagonlar sovitish tizimi bilan to‘liq jihozlangan.
- 15 ta “SV” turdagi vagonlar (sovitish tizimlari bilan to‘liq jihozlangan);
- 38 ta “Kupe” turidagi vagonlar (22 tasi sovitish tizimi bilan jihozlangan, 16 tasida havo almashtirsh (ventilyatsiya) tizimi bilan jihozlangan).
- 74 ta “Plaskart” turidagi vagonlar (havo almashtirsh (ventilyatsiya) tizimi bilan jihozlangan);
- 13 ta yo‘lovchilarni oziq-ovqat mahsulotlari bilan ta’minlashga mo‘ljallangan “Vagon-restoran” turagi vagonlar (sovitish tizimlari bilan to‘liq jihozlangan).
“Yo‘lovchi vagonlarni sovitish tizimi bilan jihozlash juda katta sarmoya talab qilinadi, sovitish tizimi bilan jihozlash imkoniyati mavjud bo‘lmagan vagonlarni yangisiga bosqichma-bosqich almashtiriladi. ‘O‘zbekiston temir yo‘llari’ AJ rahbariyati tomonidan qator ishlar amalga oshirilmoqda. Jumladan, 2022—2024-yillarlda 100 ta yangi sovitish tizimi bilan to‘liq jihozlangan vagonlarni xarid qilish reja qilingan”, — deyiladi xabarda.
Ta’kidlanishicha, yetakchi xalqaro kompaniyalar bilan barcha yo‘lovchi vagonlarni zamonaviy sovitish tizimlari bilan jihozlash maqsadida muzokaralar olib borilmoqda va yaqin vaqtda barcha turdagi yo‘lovchi vagonlar bosqichma-bosqich jihozlanishi belgilangan.
Eslatib o‘tamiz, Gidrometeorologiya xizmati markazi 25—29-iyun kunlari O‘zbekiston hududiga Turkmaniston orqali Eron hududlaridan issiq havo kirib kelishini ma’lum qilgandi. “O‘zgidromet”ning 27-iyun kuni uchun prognozlariga ko‘ra, respublikada harorat 45 darajagacha ko‘tariladi va bu anomal anomal issiq ob-havo hafta oxirigacha saqlanib qoladi.
Qayd etilishicha, bunday issiq havo paytida po‘lat izlardagi harorat yanada yuqori bo‘ladi. Shu sabab “O‘ztemiryo‘lyo‘lovchi” rahbariyati poyezdlar tezligiga cheklov kiritdi. Bu orqali poyezdlar belgilangan manzillarga kechikib borish holatlari kuzatiladi. Bundan tashqari, havo haroratining keskin ko‘tarilishi poyezdlar harakat jadvaliga ham ta’sir o‘tkazdi.
Izoh (0)