O‘zbekistonda anomal issiq ob-havo hukm surayotgani sababli “O‘ztemiryo‘lyo‘lovchi” rahbariyati poyezdlar tezligiga cheklov kiritdi. Bu haqda “O‘zbekiston temir yo‘llari” xabar qildi.

Gidrometeorologiya xizmati markazi 25—29-iyun kunlari O‘zbekiston hududiga Turkmaniston orqali Eron hududlaridan issiq havo kirib kelishini ma’lum qilgandi. Qayd etilishicha, hozirda issiq havo massalari kirib kelishi davom etmoqda.

Bunday issiq havo paytida po‘lat izlardagi harorat yanada yuqori bo‘ladi. Shu bois harakat xavfsizligini ta’minlash maqsadida anomal issiqlik tufayli poyezdlar tezligiga cheklov belgilangan. Shu sababli poyezdlar belgilangan manzillarga kechikib borish holatlari kuzatiladi.

Bundan tashqari, havo haroratining keskin ko‘tarilishi tufayli poyezd harakat jadvalida o‘zgarish kuzatilmoqda. Xususan, 26-iyun kuni:

• Toshkent—Buxoro yo‘nalishida harakatlanadigan 10-sonli Sharq poyezdi;
• Toshkent—Samarqand yo‘nalishida harakatini amalga oshirayotgan 768F-sonli;
• Buxoro—Toshkent yo‘nalishida harakatlanadigan 769 hamda 769-sonli “Afrosiyob” zamonaviy poyezdlari;
• Xiva—Andijon yo‘nalishida harakatlanadigan 656-sonli, Xiva—Buxoro yo‘nalishida harakatlanadigan 50-sonli hamda Toshkent—Qo‘ng‘iroq yo‘nalishida harakatlanadigan 54-sonli yo‘lovchi poyezdlari manziliga harakat jadvalidan kechikib borishi kuzatilmoqda.

“‘O‘zbekiston temir yo‘llari’ AJ rahbariyati bunday noqulaylik uchun yo‘lovchilardan uzr so‘raydi”, — deyiladi xabarda.

Avvalroq “O‘zgidromet” respublika bo‘yicha 26-iyunda kuzatiladigan ob-havo ma’lumotlarini e’lon qilgandi. Unga ko‘ra, O‘zbekistonda shu kuni 45 darajagacha issiq bo‘ladi.