Ўзбекистон ҳудудига Туркманистон орқали Эрон ҳудудларидан иссиқ ҳаво кириб келиши сабабли ҳаво ҳарорати 45 даража Цельсийгача кўтарилиши тўғрисида хабар берилганди. «Ўзбекистон темир йўллари»нинг маълум қилишича, бу каби иссиқ ҳароратда ҳаракат хавфсизлигини таъминлаш мақсадида поездларнинг барча турлари (юк ва йўловчи) тезлигига чеклов белгиланган.
Шунингдек, «Ўзтемир йўлйўловчи» АЖ томонидан йўловчи вагонларни янгилаш ҳамда совитиш тизими билан жиҳозлаш борасида ишлар олиб борилмоқда. Ҳозирги кунда йўловчиларга хизмат кўрсатишга мўлжалланган жами вагонлардан:
- 6 та юқори тезликда ҳаракатланувчи «Афросиёб» электропоезди (ҳар бири 11 та вагондан (умумий 66 та вагон) ташкил топган ва тўлиқ совитиш тизими билан жиҳозланган);
- 5 та тезюрар («Шарқ», «Насаф», «Ўзбекистон») йўловчи поездлар мавжуд бўлиб, умумий 46 та вагондан ташкил топган, барча вагонлар совитиш тизими билан тўлиқ жиҳозланган.
- 15 та «СВ» турдаги вагонлар (совитиш тизимлари билан тўлиқ жиҳозланган);
- 38 та «Купе» туридаги вагонлар (22 таси совитиш тизими билан жиҳозланган, 16 тасида ҳаво алмаштирш (вентиляция) тизими билан жиҳозланган).
- 74 та «Пласкарт» туридаги вагонлар (ҳаво алмаштирш (вентиляция) тизими билан жиҳозланган);
- 13 та йўловчиларни озиқ-овқат маҳсулотлари билан таъминлашга мўлжалланган «Вагон-ресторан» тураги вагонлар (совитиш тизимлари билан тўлиқ жиҳозланган).
«Йўловчи вагонларни совитиш тизими билан жиҳозлаш жуда катта сармоя талаб қилинади, совитиш тизими билан жиҳозлаш имконияти мавжуд бўлмаган вагонларни янгисига босқичма-босқич алмаштирилади. ‘Ўзбекистон темир йўллари’ АЖ раҳбарияти томонидан қатор ишлар амалга оширилмоқда. Жумладан, 2022—2024 йилларлда 100 та янги совитиш тизими билан тўлиқ жиҳозланган вагонларни харид қилиш режа қилинган», — дейилади хабарда.
Таъкидланишича, етакчи халқаро компаниялар билан барча йўловчи вагонларни замонавий совитиш тизимлари билан жиҳозлаш мақсадида музокаралар олиб борилмоқда ва яқин вақтда барча турдаги йўловчи вагонлар босқичма-босқич жиҳозланиши белгиланган.
Эслатиб ўтамиз, Гидрометеорология хизмати маркази 25—29 июнь кунлари Ўзбекистон ҳудудига Туркманистон орқали Эрон ҳудудларидан иссиқ ҳаво кириб келишини маълум қилганди. «Ўзгидромет»нинг 27 июнь куни учун прогнозларига кўра, республикада ҳарорат 45 даражагача кўтарилади ва бу аномал аномал иссиқ об-ҳаво ҳафта охиригача сақланиб қолади.
Қайд этилишича, бундай иссиқ ҳаво пайтида пўлат излардаги ҳарорат янада юқори бўлади. Шу сабаб «Ўзтемир йўлйўловчи» раҳбарияти поездлар тезлигига чеклов киритди. Бу орқали поездлар белгиланган манзилларга кечикиб бориш ҳолатлари кузатилади. Бундан ташқари, ҳаво ҳароратининг кескин кўтарилиши поездлар ҳаракат жадвалига ҳам таъсир ўтказди.
Изоҳ (0)