Ukraina Rossiya bilan yadro xavfsizligi sohasidagi hamkorlikka taalluqli xalqaro shartnomalar amal qilishini to‘xtatib qo‘ydi, deb yozadi “RBK”.
Buyruqqa ko‘ra, quyidagi xalqaro shartnomalar amal qilishi to‘xtatiladi:
- Ukraina Atrof-muhit muhofazasi va yadro xavfsizligi vazirligi hamda Rossiya yadroviy va radiatsiyaviy xavfsizlik bo‘yicha federal nazorati o‘rtasidagi hamkorlik to‘g‘risidagi bitim (1996-yil 19-sentabrda Venada imzolangan);
- Ukraina davlat yadrobiy tartibga solish qo‘mitasi va hamda Rossiya yadroviy va radiatsiyaviy xavfsizlik bo‘yicha federal nazorati o‘rtasidagi tinch maqsadlarda yadro energiyasidan foydalanish chog‘ida axborot almashinuvi va xavfsizlikni tartibga solish sohasidagi hamkorlik bo‘yicha bitim (2002-yil 14-avgustda Moskvada imzolangan).
Rossiya maxsus operatsiyasi boshlanishidan avvalroq Ukraina prezidenti Vladimir Zelenskiy Myunxendagi xavfsizlik bo‘yicha anjumanda Budapesht memorandumi doirasida kelishuvlar o‘tkazilishini boshlashini aytgandi.
O‘shanda u sammit amalga oshmasa yoki Ukrainaga xavfsizlik kafolati berilmasa, Kiyev hujjatni 1994-yilda imzolangan bandlar bilan birga haqiqiy emas, deb topishini ta’kidlagandi.
Budapesht memorandumi 1994-yil 5-dekabrda Buyuk Britaniya, Rossiya, AQSH va Ukraina tomonidan imzolangan bo‘lib, Kiyevning yadro qurolidan voz kechishi evaziga Ukraina xavfsizligi va hududiy yaxlitligi kafolatlanishini ko‘zda tutardi.
Hujjat Ukraina Yadro qurolini tarqatmaslik to‘g‘risidagi shartnomaga qo‘shilishi munosabati bilan kuchga kirgan. Shartnomani imzolagan davlatlar Ukraina suverenitetini hurmat qilish va unga nisbatan kuch qo‘llashdan tiyilish majburiyatlarini o‘z bo‘yniga olgan.
21-fevral kuni rossiyaliklarga yo‘llagan murojaatida prezident Putin Zelenskiyning Kiyev yadro qurolidan voz kechishni qayta ko‘rib chiqishi mumkinligi haqidagi bayonoti “quruq gaplar” emasligini aytgandi. Uning ta’kidlashicha, Ukraina hukumatida sovet davriga tegishli yadro texnologiyalari va ularni yetkazish vositalari, shu jumladan, aviatsiya va parvoz masofasi 100 kilometrdan oshadigan “Tochka-U” tezkor-taktik raketalari bor.
Izoh (0)