Yaponiya Rossiyaga qarshi sanksiyalarni 70 nafar jismoniy va 90 ta yuridik shaxsga kengaytiradi, shuningdek, Rossiyadan oltin import qilish va bir qator xizmatlar ko‘rsatishni taqiqlaydi. Bu haqda Yaponiya bosh vaziri Fumio Kisidaning G7 sammitidagi bayonotiga tayanib NHK telekanali xabar berdi.
Bosh vazirning so‘zlariga ko‘ra, sanksiyalar birinchi navbatda Rossiya mudofaa sanoati bilan bog‘liq shaxslar va tashkilotlarga ta’sir qiladi. Ularning Yaponiyadagi hisoblari muzlatiladi.
“Biz Rossiyaning Ukrainaga bosqini singari status-kvoning bir tomonlama o‘zgarishi sodir bo‘ladigan dunyoni qabul qilmaymiz, biz qonun ustuvorligiga asoslangan xalqaro tartibni mustahkamlaymiz”, — dedi Kisida.
Fevral oyi oxiridan boshlab Yaponiya hukumati Rossiyaga qarshi bir nechta cheklovchi choralar paketini ma’qulladi, kompaniyalar va jismoniy shaxslarga nisbatan sanksiyalar joriy qildi, mamlakatga sarmoya kiritishni taqiqladi, eksportni chekladi va savdoda imtiyozli rejimni bekor qildi. Xususan, iyun oyi boshida Tokio Rossiyaga “sanoat infratuzilmasini mustahkamlashga yordam beradigan” mahsulotlar: po‘lat baklar, konveyerlar, samosvallar, buldozerlar, to‘quv dastgohlari va boshqalarni eksport qilishni taqiqladi.
NHK avvalroq Rossiyaga qarshi sanksiyalar Yaponiyaning eng yirik banklari Mitsubishi UFJ, Sumitomo Mitsui va Mizuho 2,7 milliard dollardan ko‘proq zarar ko‘rgani haqida xabar bergan edi. Yo‘qotishlarning aksariyati bank mijozlari sanksiyalar ta’sirida ularga berilgan kreditlarni to‘lay olmayotgani bilan bog‘liq.
Rossiya sanksiyalarga javoban choralar ko‘rdi: 63 nafar Yaponiya fuqarosining mamlakatga kirishini taqiqladi. Cheklovlarga bosh vazir Fumio Kisida, Vazirlar Mahkamasi bosh kotibi Xirokadzu Matsuno, tashqi ishlar vaziri Yosimasa Xayasi, moliya vaziri Syuniti Sudzuki, mudofaa vaziri Nobuo Kisi va adliya vaziri Yosixisa Furukava, shuningdek, Yaponiya parlamentining ikki palatasi a’zolari kiritilgan. Bundan oldin, mart oyida Moskva Tokio bilan tinchlik kelishuvi bo‘yicha muzokara qilishdan bosh tortgan edi.
Izoh (0)