Moskvada sud 2018-yilda Moskva davlat xalqaro aloqalar instituti (MGIMO) talabasi, qozog‘istonlik Tomiris Baysafani o‘ldirishda ayblangan Murtazali Mejidovni 13 yillik qat’iy rejimdagi koloniyaga hukm qildi, deb yozadi Meduza.
Mejidov sud maslahatchilari tomonidan aybdor deb topildi. Bu — ishning ikkinchi marta ko‘rib chiqilishi bo‘lib, 2021-yilda maslahatchilar kollegiyasi uni oqlagan, biroq Moskva shahar sudi u hukmni bekor qilgan edi.
2018-yil 13-aprelida 21 yoshli Tomiris Baysafa MGIMO binosining to‘rtinchi qavatidan tushib ketgandi. U hushiga kelmasdan, 3-may kuni kasalxonada vafot etgan.
Marhumaning onasi aytishicha, u o‘zining guruhdoshi, 2013-yilda Dog‘iston hukumatiga rahbarlik qilgan Muxtar Mejidovning o‘g‘li Murtazali Mejidov bilan ikki yil davomida uchrashib yurgan. Uning so‘zlariga ko‘ra, qizining o‘limidan oldinroq Mejidov uni bo‘sh auditoriyaga chaqirib, eshikni qulflab olgan va “o‘z noroziliklarini to‘kib-sochishni boshlagan”.
Mejidov qotillikda gumonlanib, 2020-yilda qo‘lga olingan. Unga qadar, Tomiris Baysafaning onasi aytishicha, tergov o‘z joniga qasd qilish versiyasida turib olgandi.
Izoh (0)