BMT bosh kotibi Antoniu Guterrish Rossiya, Ukraina, Turkiya, Yevroittifoq va AQSH bilan Ukraina mahsulotini Qora dengiz orqali eksport qilish, shuningdek, dunyo uchun “o‘ta zarur bo‘lgan” Rossiya don mahsulotlari va o‘g‘itlarini tashish bo‘yicha “qizg‘in muloqot” olib borilayotganini ma’lum qildi, deb yozadi “RBK”.
“Ukrainaliklar bilan ham, rossiyaliklar va turkiyaliklar bilan ham, boshqa tomondan esa AQSH va Yevroittifoq bilan Ukraina oziq-ovqat mahsulotlarini Qora dengizda xavfsiz va ishonchli eksport qilishga, shu bilan birga, dunyo uchun mutlaqo zarur bo‘lgan Rossiya don mahsulotlari va o‘g‘itlarini eksport qilishga ko‘maklashish uchun qizg‘in muloqotlar bo‘ldi”, — dedi Guterrish.
Guterrish oziq-ovqat inqirozini tartibga solish uchun Rossiya va Ukrainani don eksportini qayta tiklash usulini topishga bir necha marta chaqirgan edi. Bosh kotib tayangan ma’lumotlarga ko‘ra, Rossiya va Ukrainaning dunyo bug‘doy eksportidagi umumiy ulushi taxminan 29 foizga yetardi.
O‘z navbatida Rossiya prezidenti Vladimir Putin Moskva dunyo oziq-ovqat inqirozini hal qilishda yordam berishga tayyorligini aytib, sanksiyalar bekor qilinishi evaziga o‘g‘it va qishloq xo‘jalik mahsulotlari eksportini oshirishni taklif qilgandi. Putinning fikricha, oziq-ovqat bozoridagi joriy vaziyat G‘arb mamlakatlarining “xato iqtisodiy va moliyaviy siyosati” va ularning Rossiyaga qarshi sanksiyalari keltirib chiqargan.
Rossiya maxsus operatsiyasi fonida eksport uchun yo‘naltirilgan don ortilgan kemalar Ukraina portlaridan chiqishdan to‘xtadi. Kiyev Moskvani portlarni yopib qo‘yishda aybladi va xalqaro hamjamiyatni vaziyatni hal qilishda qatnashishga chaqirdi.
Rossiya hukumati dengiz orqali eksportga to‘sqinlik qilmayotganini aytib, kemalar xavfsiz ravishda chqiib ketishi uchun Ukraina tomoni portlarni minalardan tozalashi kerakligini ta’kidladi. Moskva dunyoda oziq-ovqat inqirozining kuchayishini ham G‘arb mamlakatlari tomonidan Rossiyaga qarshi kiritilgan sanksiyalar bilan bog‘ladi.
Izoh (0)