Украина Россия билан ядро хавфсизлиги соҳасидаги ҳамкорликка тааллуқли халқаро шартномалар амал қилишини тўхтатиб қўйди, деб ёзади «РБК».
Буйруққа кўра, қуйидаги халқаро шартномалар амал қилиши тўхтатилади:
- Украина Атроф-муҳит муҳофазаси ва ядро хавфсизлиги вазирлиги ҳамда Россия ядровий ва радиациявий хавфсизлик бўйича федерал назорати ўртасидаги ҳамкорлик тўғрисидаги битим (1996 йил 19 сентябрда Венада имзоланган);
- Украина давлат ядробий тартибга солиш қўмитаси ва ҳамда Россия ядровий ва радиациявий хавфсизлик бўйича федерал назорати ўртасидаги тинч мақсадларда ядро энергиясидан фойдаланиш чоғида ахборот алмашинуви ва хавфсизликни тартибга солиш соҳасидаги ҳамкорлик бўйича битим (2002 йил 14 августда Москвада имзоланган).
Россия махсус операцияси бошланишидан аввалроқ Украина президенти Владимир Зеленский Мюнхендаги хавфсизлик бўйича анжуманда Будапешт меморандуми доирасида келишувлар ўтказилишини бошлашини айтганди.
Ўшанда у саммит амалга ошмаса ёки Украинага хавфсизлик кафолати берилмаса, Киев ҳужжатни 1994 йилда имзоланган бандлар билан бирга ҳақиқий эмас, деб топишини таъкидлаганди.
Будапешт меморандуми 1994 йил 5 декабрда Буюк Британия, Россия, АҚШ ва Украина томонидан имзоланган бўлиб, Киевнинг ядро қуролидан воз кечиши эвазига Украина хавфсизлиги ва ҳудудий яхлитлиги кафолатланишини кўзда тутарди.
Ҳужжат Украина Ядро қуролини тарқатмаслик тўғрисидаги шартномага қўшилиши муносабати билан кучга кирган. Шартномани имзолаган давлатлар Украина суверенитетини ҳурмат қилиш ва унга нисбатан куч қўллашдан тийилиш мажбуриятларини ўз бўйнига олган.
21 февраль куни россияликларга йўллаган мурожаатида президент Путин Зеленскийнинг Киев ядро қуролидан воз кечишни қайта кўриб чиқиши мумкинлиги ҳақидаги баёноти «қуруқ гаплар» эмаслигини айтганди. Унинг таъкидлашича, Украина ҳукуматида совет даврига тегишли ядро технологиялари ва уларни етказиш воситалари, шу жумладан, авиация ва парвоз масофаси 100 километрдан ошадиган «Точка-У» тезкор-тактик ракеталари бор.
Изоҳ (0)