O‘zbekistonda insonga nisbatan huquqiy ta’sir choralari davlat organi tomonidan ko‘zlanadigan qonuniy maqsadga erishish uchun yetarli bo‘lishi kerakligi ta’kidlanmoqda.
Bu haqda 25 iyun kuni jamoatchilik muhokamasiga qo‘yilgan Konstitutsiyasiga o‘zgartirishlar kiritish to‘g‘risidagi qonun loyihasida e’lon qilindi.
Unga ko‘ra Konstitutsiyaning 13-moddasi quyidagicha ko‘rinish olishi ko‘zda tutilgan:
“Insonga nisbatan huquqiy ta’sir choralari davlat organi tomonidan ko‘zlanadigan qonuniy maqsadga erishish uchun yetarli bo‘lishi hamda manfaatdor shaxslarga imkon qadar qiyinchilik tug‘dirmasligi kerak”.
Prezident Shavkat Mirziyoyev 2022-yil 20-iyunda Konstitutsiyaviy komissiya a’zolari bilan uchrashuvda “mantiqsiz holatlarning oldini olish uchun yangi bir normani Konstitutsiyaga kiritish taklifini bildiraman. Ya’ni ma’muriy, fuqarolik, iqtisodiy, jinoiy javobgarlik va boshqa yo‘nalishdagi ishlarni ko‘rib chiqishda insonga nisbatan qo‘llaniladigan huquqiy ta’sir choralari qonuniy maqsadga erishish uchun yetarli bo‘lishi hamda shaxsga imkon qadar yengillik yaratishi kerak”, — deb ta’kidlab o‘tgan edi.
Konstitutsiyaga kiritilayotgan ushbu yangilik fuqarolarning davlat idoralari bilan bo‘layotgan munosabatlarida yuzaga keladigan qator muammo va vazifalarni, inson huquqlariga rioya qilgan holda amalga oshirish imkoniyatini kengaytiradi.
Bunday normalar dunyoning ko‘plab davlatlarining konstitutsiyalarida normativ tarzda tartibga solingan va ko‘plab mamlakatlarning milliy sud amaliyotida qo‘llaniladi. Bu tamoyil nafaqat barcha Markaziy Yevropa va Sharqiy Yevropa davlatlari, balki Tunis, Janubiy Afrika va Isroil, Lotin Amerikasi, Avstraliya va Yangi Zelandiya, Koreya va Hindiston kabi davlatlarda ham mavjud.
Izoh (0)