“Ommaviy axborot vositalarini qo‘llab-quvvatlash va jurnalistika sohasini rivojlantirish chora-tadbirlari to‘g‘risida”gi prezident qarori qabul qilindi. Bu haqda Telegram’dagi “Huquqiy axborot” kanali xabar qildi.
Qarorga muvofiq, 2022-yil 1-iyuldan 2025-yil 1-iyulgacha:
- ommaviy axborot vositalari foyda solig‘ini 50 foiz kamaytirilgan holda to‘laydi;
- O‘zbekistonda ishlab chiqarilmaydigan matbaa uskunalari, zamonaviy foto va radiotelevizion uskunalar hamda qog‘oz bojxona bojidan ozod etiladi.
2022-yil 1-oktabrdan bolalar uchun mo‘ljallangan tele va radiomahsulotlarni ishlab chiqarish va efirga uzatish bo‘yicha har yili eng yaxshi 30 ta loyiha uchun har biri BHMning 300 baravarigacha (90 mln. so‘mgacha) bo‘lgan tanlov e’lon qilinadi.
Har chorakda OAVda e’lon qilingan 100 tagacha eng yaxshi material uchun mualliflar BHMning 50 baravarigacha (15 mln so‘mgacha) miqdorda pul bilan taqdirlanadi.
2023-yildan “Oltin qalam” milliy mukofoti sovrindorlari:
- bosh milliy mukofot uchun – avtomobil;
- 1-o‘rin uchun – BHMning 200 baravari (60 mln so‘m);
- 2-o‘rin uchun – BHMning 175 baravari (52 mln 500 ming so‘m);
- 3-o‘rin uchun – BHMning 150 baravari (45 mln so‘m);
- 12 ta rag‘batlantiruvchi nominatsiyaning har biri uchun – BHMning 100 baravari (30 mln so‘m) miqdorida pul mukofoti bilan taqdirlanadi.
2026-yil 1-yanvargacha “Obuna” platformasi orqali obuna qilingan nashrlar obuna narxining 10 foiz, bolalar uchun mo‘ljallangan davriy bosma nashrlar obuna narxining 20 foiz miqdori davlat tomonidan qaytarib beriladi.
Izoh (0)