Ўзбекистонда инсонга нисбатан ҳуқуқий таъсир чоралари давлат органи томонидан кўзланадиган қонуний мақсадга эришиш учун етарли бўлиши кераклиги таъкидланмоқда.
Бу ҳақда 25 июнь куни жамоатчилик муҳокамасига қўйилган Конституциясига ўзгартиришлар киритиш тўғрисидаги қонун лойиҳасида эълон қилинди.
Унга кўра Конституциянинг 13-моддаси қуйидагича кўриниш олиши кўзда тутилган:
«Инсонга нисбатан ҳуқуқий таъсир чоралари давлат органи томонидан кўзланадиган қонуний мақсадга эришиш учун етарли бўлиши ҳамда манфаатдор шахсларга имкон қадар қийинчилик туғдирмаслиги керак».
Президент Шавкат Мирзиёев 2022 йил 20 июнда Конституциявий комиссия аъзолари билан учрашувда «мантиқсиз ҳолатларнинг олдини олиш учун янги бир нормани Конституцияга киритиш таклифини билдираман. Яъни маъмурий, фуқаролик, иқтисодий, жиноий жавобгарлик ва бошқа йўналишдаги ишларни кўриб чиқишда инсонга нисбатан қўлланиладиган ҳуқуқий таъсир чоралари қонуний мақсадга эришиш учун етарли бўлиши ҳамда шахсга имкон қадар енгиллик яратиши керак», — деб таъкидлаб ўтган эди.
Конституцияга киритилаётган ушбу янгилик фуқароларнинг давлат идоралари билан бўлаётган муносабатларида юзага келадиган қатор муаммо ва вазифаларни, инсон ҳуқуқларига риоя қилган ҳолда амалга ошириш имкониятини кенгайтиради.
Бундай нормалар дунёнинг кўплаб давлатларининг конституцияларида норматив тарзда тартибга солинган ва кўплаб мамлакатларнинг миллий суд амалиётида қўлланилади. Бу тамойил нафақат барча Марказий Европа ва Шарқий Европа давлатлари, балки Тунис, Жанубий Африка ва Исроил, Лотин Америкаси, Австралия ва Янги Зеландия, Корея ва Ҳиндистон каби давлатларда ҳам мавжуд.
Изоҳ (0)