AQSH “Ukraina suvereniteti, hududiy yaxlitligi va siyosiy mustaqilligini buzganlik yoki ularga xavf solganlik uchun” yoki Rossiya ichkarisida “boshqacha fikrlashni bostirganlik” uchun taxminan 500 nafar rossiyalik mansabdorga qarshi viza cheklovlarini kiritadi, deb yozadi “RBK” Oq uy saytiga tayanib.
Bundan tashqari, Moliya vazirligi va Davlat departamenti Ukraina hududida faoliyat olib boruvchi harbiy kompaniyalarga, shuningdek, Ukrainada “inson huquqlari yoki xalqaro gumanitar huquqni buzishda” ishtirok etgan Rossiya qurolli kuchlari bo‘linmalariga qarshi bloklovchi sanksiyalar kiritadi. Jangovar harakatlar chog‘ida nazorat ostiga olingan hududlarning rossiyaparast ma’muriyatlari a’zolari ham cheklovlar ta’siri ostida qoladi.
AQSH Savdo vazirligi Rossiyani qo‘llab-quvvatlayotgan kompaniyalar uchun Amerika tovarlari va texnologiyalaridan foydalanish imkoniyatini cheklaydi, Davlat departamenti va Moliya vazirligi esa Moskvaga sanksiyalarni aylanib o‘tishda yordam berayotgan shaxslarga qarshi sanksiyalar kiritadi. Bundan tashqari, idoralar Rossiya mudofaa sektorida yetkazib berishlar zanjirlariga qarshi choralar ko‘radi. Sanksiyalar yirik davlat mudofaa korporatsiyalariga, shuningdek, ushbu sohaga aloqador odamlar va tashkilotlarga qarshi joriy qilinadi.
Kongressning Rossiyani AQSH bilan savdoda eng ko‘p qulaylik yaratuvchi maqomidan mahrum qilish qarori tufayli Vashington Rossiyaning qariyb 2,3 milliard dollarlik 570 dan ortiq toifadagi tovarlariga bojni oshiradi.
Oq uy avvalroq e’lon qilingan, Rossiya oltini importini cheklash niyatini ham tasdiqladi: Moliya vazirligi uni olib kirishni taqiqlaydi.
Sanksiyalar boshqa G7 mamlakatlari bilan kelishilgan holda kiritilmoqda.
Moskvaga qarshi cheklovlarni kengaytirish Germaniyada 26—28-iyun kunlari bo‘lib o‘tayotgan G7 sammitida muhokama qilinmoqda.
Izoh (0)