Welt: Rossiyalik biznesmenlar sanksiyalarga qaramay Yevropa ustidan uchib o‘tmoqda

Rossiyalik biznesmenlarning shaxsiy samolyotlari va vertolyotlari sanksiyalarga qaramay, Yevropa Ittifoqi (YI) hududi uzra parvozni davom ettirmoqda, deb yozadi Welt am Sonntag parvozlarni kuzatish xizmatlari ma’lumotlariga tayanib. Yevropa Ittifoqining sanksiyalari joriy etilganidan buyon Yevropa osmonida rossiyaliklarga tegishli bo‘lgan 30 ga yaqin samolyot parvoz qilgan.

Welt am Sonntag xabariga ko‘ra, mart oyi o‘rtalarida Britaniya rasmiylari G-LATO davlat raqamiga ega Cessna samolyotining parvozini to‘xtatib qolgan. Layner go‘yoki “neft milliarderi” Yevgeniy Shvidlerga tegishli bo‘lgan. Londonda musodara qilinishidan oldin tadbirkorning shaxsiy samolyoti Yevropa Ittifoqi hududidan sakkiz marta uchib o‘tgan, deb yozadi gazeta.

Bundan tashqari, San-Marinoda ro‘yxatdan o‘tgan va Shveysariya kompaniyasi tomonidan boshqariladigan T7-7AA davlat raqamiga ega Bombardier samolyoti 2-mart kuni Nitssadan Istanbulga uchgan. Gazetaning yozishicha, layner biznesmen Albert Avdolyanga tegishli. Viktor Vekselbergga aloqador va Lyuksemburgda ro‘yxatdan o‘tgan samolyot aprel oyida Bazeldan chiqib, Nur-Sultonga uchgan. Biznesmen Aleksandr Zanadvorovning vertolyoti esa Fransiya uzra kamida sakkiz marta uchib o‘tgan.

“Rossiyadan tashqarida ro‘yxatdan o‘tgan va Rossiyaniki bo‘lmagan kompaniyalarga tegishli biznes-jetlar va vertolyotlarga nisbatan sanksiyalarni qo‘llash mulkchilikning noshaffof tuzilmalari tufayli ba’zan qiyin kechadi”, — deya tushuntirdi nashrga Yevropa Ittifoqining ismi oshkor etilmagan rasmiysi.

Yevropa Ittifoqi va AQSH Rossiya samolyotlari uchun osmonini yopgan. Sanksiyalar 24-fevral kuni Vladimir Putin tomonidan Ukrainada boshlangan harbiy amaliyotga javoban joriy qilingan. G‘arb sanksiya ro‘yxatiga rossiyalik amaldorlar va tadbirkorlarni ham kiritdi, bu ularning xorijdagi barcha aktivlari muzlatilishini anglatadi. Rossiyalik ishbilarmonlarning muzlatilgan mulki umumiy qiymati may oyining oxiriga kelib 10 milliard yevroni tashkil etdi.