АҚШ «Украина суверенитети, ҳудудий яхлитлиги ва сиёсий мустақиллигини бузганлик ёки уларга хавф солганлик учун» ёки Россия ичкарисида «бошқача фикрлашни бостирганлик» учун тахминан 500 нафар россиялик мансабдорга қарши виза чекловларини киритади, деб ёзади «РБК» Оқ уй сайтига таяниб.
Бундан ташқари, Молия вазирлиги ва Давлат департаменти Украина ҳудудида фаолият олиб борувчи ҳарбий компанияларга, шунингдек, Украинада «инсон ҳуқуқлари ёки халқаро гуманитар ҳуқуқни бузишда» иштирок этган Россия қуролли кучлари бўлинмаларига қарши блокловчи санкциялар киритади. Жанговар ҳаракатлар чоғида назорат остига олинган ҳудудларнинг россияпараст маъмуриятлари аъзолари ҳам чекловлар таъсири остида қолади.
АҚШ Савдо вазирлиги Россияни қўллаб-қувватлаётган компаниялар учун Америка товарлари ва технологияларидан фойдаланиш имкониятини чеклайди, Давлат департаменти ва Молия вазирлиги эса Москвага санкцияларни айланиб ўтишда ёрдам бераётган шахсларга қарши санкциялар киритади. Бундан ташқари, идоралар Россия мудофаа секторида етказиб беришлар занжирларига қарши чоралар кўради. Санкциялар йирик давлат мудофаа корпорацияларига, шунингдек, ушбу соҳага алоқадор одамлар ва ташкилотларга қарши жорий қилинади.
Конгресснинг Россияни АҚШ билан савдода энг кўп қулайлик яратувчи мақомидан маҳрум қилиш қарори туфайли Вашингтон Россиянинг қарийб 2,3 миллиард долларлик 570 дан ортиқ тоифадаги товарларига божни оширади.
Оқ уй аввалроқ эълон қилинган, Россия олтини импортини чеклаш ниятини ҳам тасдиқлади: Молия вазирлиги уни олиб киришни тақиқлайди.
Санкциялар бошқа G7 мамлакатлари билан келишилган ҳолда киритилмоқда.
Москвага қарши чекловларни кенгайтириш Германияда 26—28 июнь кунлари бўлиб ўтаётган G7 саммитида муҳокама қилинмоқда.
Изоҳ (0)