Checheniston rahbari Ramzan Qodirov “Ahmad” tezkor javob ko‘rsatish maxsus otryadi jangchilari va “Lugansk xalq respublikasi” kuchlari Ukrainaning Lugansk viloyatida sanoat zonasi va Severodonetsk aeroporti ustidan nazorat o‘rnatganini da’vo qilmoqda, deb yozadi Meduza.
“Severodonetskdagi ‘Azot’ zavodi nazorat ostida. Borovskoye qishlog‘i ham nazorat ostida, tozalayapmiz. Severodonetsk hududidagi xalqaro aeroport ham ozod etildi”, — dedi Qodirov o‘z Telegram-kanalida e’lon qilingan videoda.
Shuningdek, u “Azot” zavodidan 800 nafar tinch aholi vakili chiqqanini ma’lum qildi. Boshqa manbalar bu ma’lumotni tasdiqlaganicha yo‘q. Severodonetsk harbiy-fuqarolik ma’muriyati rahbari Aleksandr Stryuk 25-iyun kuni “Azot”da tinch fuqarolar qolganini aytgandi.
24-iyun kuni Lugansk viloyati hukumati ukrain qo‘shinlariga so‘nggi haftalarda jang borayotgan Severodonetskdan chekinish buyurilganini ma’lum qildi. Shundan keyin Ukraina Mudofaa vazirligi harbiylarning rasmiy xabaridan oldin Severodonetskdan qo‘shinlar olib ketilgani haqida bayonot berganlarni tanqid qildi.
Rossiya qo‘shinlari va “Lugansk xalq respublikasi” kuchlari Severodonetskni (2014-yildan Ukrainaning Lugansk viloyati markazi) may oxirida nazoratga olgani haqida Checheniston rahbari Ramzan Qodirov ma’lum qilgandi. Rossiya mudofaa vaziri Sergey Shoygu shaharning turar-joy dahalari “ozod etilgani”, biroq sanoat zonalarida, shu jumladan, Ukrainadagi eng yirik kimyo zavodi — “Azot” hududida ukrainalik harbiylar qolayotganini aytgandi.
LXRning Rossiyadagi elchisi Rodion Miroshnikning aytishicha, “Azot” zavodi hududida o‘sha paytda qariyb 300—400 ukrain harbiylari bo‘lgan.
23-iyun kuni LXR rahbari Leonid Pasechnik LXR Xalq militsiyasi Severodonetskdagi “Azot” kimyo zavodi sanoat zonasi uchun janglarni davom ettirayotgani va tez orada bu hudud nazorat ostiga olinishini aytgandi.
Ayni vaqtda, LXR Xalq militsiyasi rasmiy vakili Andrey Marochko ukrain harbiylari Severodonetsk va Lisichansk hududida yoppasiga asirlikka taslim bo‘layotgani, ular orasida asosan oddiy askarlar bo‘lib, “birorta ham ofitser” yo‘qligini ma’lum qildi. Uning da’vo qilishicha, Ukraina qo‘mondonligi qurshovga olish oldidan chekingan.
Izoh (0)