Чеченистон раҳбари Рамзан Қодиров «Аҳмад» тезкор жавоб кўрсатиш махсус отряди жангчилари ва «Луганск халқ республикаси» кучлари Украинанинг Луганск вилоятида саноат зонаси ва Северодонецк аэропорти устидан назорат ўрнатганини даъво қилмоқда, деб ёзади Meduza.
«Северодонецкдаги ‘Азот’ заводи назорат остида. Боровское қишлоғи ҳам назорат остида, тозалаяпмиз. Северодонецк ҳудудидаги халқаро аэропорт ҳам озод этилди», — деди Қодиров ўз Telegram-каналида эълон қилинган видеода.
Шунингдек, у «Азот» заводидан 800 нафар тинч аҳоли вакили чиққанини маълум қилди. Бошқа манбалар бу маълумотни тасдиқлаганича йўқ. Северодонецк ҳарбий-фуқаролик маъмурияти раҳбари Александр Стрюк 25 июнь куни «Азот»да тинч фуқаролар қолганини айтганди.
24 июнь куни Луганск вилояти ҳукумати украин қўшинларига сўнгги ҳафталарда жанг бораётган Северодонецкдан чекиниш буюрилганини маълум қилди. Шундан кейин Украина Мудофаа вазирлиги ҳарбийларнинг расмий хабаридан олдин Северодонецкдан қўшинлар олиб кетилгани ҳақида баёнот берганларни танқид қилди.
Россия қўшинлари ва «Луганск халқ республикаси» кучлари Северодонецкни (2014 йилдан Украинанинг Луганск вилояти маркази) май охирида назоратга олгани ҳақида Чеченистон раҳбари Рамзан Қодиров маълум қилганди. Россия мудофаа вазири Сергей Шойгу шаҳарнинг турар-жой даҳалари «озод этилгани», бироқ саноат зоналарида, шу жумладан, Украинадаги энг йирик кимё заводи — «Азот» ҳудудида украиналик ҳарбийлар қолаётганини айтганди.
ЛХРнинг Россиядаги элчиси Родион Мирошникнинг айтишича, «Азот» заводи ҳудудида ўша пайтда қарийб 300—400 украин ҳарбийлари бўлган.
23 июнь куни ЛХР раҳбари Леонид Пасечник ЛХР Халқ милицияси Северодонецкдаги «Азот» кимё заводи саноат зонаси учун жангларни давом эттираётгани ва тез орада бу ҳудуд назорат остига олинишини айтганди.
Айни вақтда, ЛХР Халқ милицияси расмий вакили Андрей Марочко украин ҳарбийлари Северодонецк ва Лисичанск ҳудудида ёппасига асирликка таслим бўлаётгани, улар орасида асосан оддий аскарлар бўлиб, «бирорта ҳам офицер» йўқлигини маълум қилди. Унинг даъво қилишича, Украина қўмондонлиги қуршовга олиш олдидан чекинган.
Изоҳ (0)