Biologiya va tibbiyot sohasidagi nufuzli ilmiy nashrlardan biri — Britaniyaning The Lancet jurnalida e’lon qilingan yangi tadqiqotga ko‘ra, dunyo aholisining emlanishi 2020-yil dekabridan 2021-yil dekabrigacha bo‘lgan davrda qariyb 20 millionta o‘limning oldini olgan, deb yozadi “Interfaks”.
Matematik modellashtirish asosida tadqiqotchilar vaksinalar butun dunyoda o‘limlarning potensial sonini ikki marta qisqartiradi, degan xulosaga keldi.
Ekspertlar hisob-kitoblariga ko‘ra, vaksinatsiya bo‘lmaganida, dunyo bo‘ylab 31,4 million kishi koronavirusga chalinish oqibatlaridan vafot etgan bo‘lardi.
Hujjatda aytilishicha, vaksinalar ta’sirida vaksinatsiyaning birinchi yili davomida, ehtimol, millionlab hayotlar saqlanib qolingan.
“Kelajakda vaksinalarga nisbatan intellektual mulkni tezroq tarqatish zarur, vaksinalarni ishlab chiqarish va taqsimlash bilan bo‘gliq texnologiya va bilimlarni yanada ochiqroq uzatish orqali”, — deyiladi jurnalda.
Ekspertlar fikricha, “shuningdek, vaksinalarni butun dunyo bo‘ylab tarqatish va yetkazib berish infratuzilmasini kengaytirish va ularga nisbatan talabni oshirish uchun dezinformatsiya bilan kurashish kerak”.
Amerikaning Jons Hopkins universiteti ma’lumotlariga ko‘ra, pandemiya boshidan buyon ayni paytgacha butun dunyoda koronavirusga qarshi 11,6 milliard doza turli vaksinalar qo‘llanilgan. 6,3 million kishi COVID-19 qurboniga aylangan.
Izoh (0)