Yevroittifoq davlatlarining yetakchilari Ukraina va Moldovaga YI a’zoligi uchun nomzodlik maqomi berilishini ma’qulladi

Yevropa ittifoqining navbatdagi sammitida Ukraina hamda Moldovaga YI a’zoligi uchun nomzod mamlakat maqomini berish masalasi ma’qullandi. Bu haqda Lyuksemburg bosh vaziri Ksavye Bettel hamda Yevropa kengashi rahbari Sharl Mishel ma’lum qilgan.

“Ukraina xalqi uchun umid chiroqlari yondi va tarixiy palla yaqinlashmoqda”, — deb yozgan Bettel Twitter’da.

Mishel esa Ukraina prezidenti Vladimir Zelenskiy va Moldova davlat rahbari Maya Sanduni tabriklab, kelajakda mazkur ikki mamlakat hamda YI hamkorligi yanada mustahkamlanishiga ishonch bildirgan.

Yevropa kengashi rahbari Yevroittifoq sammitida Gruziyaning ham g‘arb tomon dadil qadam tashlayotganini qayd etib, ushbu mamlakat bir qator talablarni bajarganidan so‘ng Tbilisiga ham nomzod maqomi berilishi mumkinligini ta’kidladi.