Украина мудофаа вазири Алексей Резников 23 июнь, пайшанба куни Украинага АҚШ томонидан тақдим этилган HIMARS баравар ўт очиш реактив тизимлари етиб келганини маълум қилди, деб ёзади «Интерфакс».
«HIMARS Украинага келди», — деб ёзди Резников Twitter’да.
Шунингдек, АҚШ Украинага 450 миллион долларлик қўшимча ҳарбий ёрдам пакетини ажратиши маълум бўлди. Бу ҳақда Оқ уйдаги брифингда Пентагон вакили Жон Кирби маълум қилди.
Янги пакетга баравар ўт очиш ракета тизимлари, патруль катерлари, артиллерия ўқ-дорилари киради.
Кирби қайд этишича, уруш бошланганидан бери Украинага тақдим этилган ёрдамнинг умумий қиймати 6,1 миллиард долларни ташкил қилган. Американинг жорий маъмурияти ҳокимият тепасига келганидан буён эса Украинага жами 6,8 миллиард доллар ажратилган.
Апрель ойида АҚШ Иккинчи жаҳон уруши тугаганидан кейин биринчи марта ленд-лиз дастурини ишга туширган, у ижара ёки давомий бўлиб-бўлиб тўлаш шартлари билан Украинага қурол-яроғ тақдим этиш имкониятини беради.
Июнь бошида АҚШ президенти Жо Байден Украинага у бир неча ҳафталардан буён сўраб келаётган HIMARS баравар ўт очиш реактив тизимларини етказиб бериш тўғрисидаги фармонни имзолади. АҚШ Украина улардан Россия ҳудудига зарбалар беришда фойдаланмасликка ваъда берганини маълум қилди.
Аввалроқ АҚШ Халқаро тараққиёт агентлиги (USAID) раҳбари Саманта Пауэр Украина ҳукумати ҳарбий можаролар фонида ойига ўртача 5-6 миллиард доллар сарфлаётганини маълум қилганди.
Изоҳ (0)