Qozog‘iston va Yevropa Ittifoqi o‘rtasidagi hamkorlik “yangi geosiyosiy kontekstdan kelib chiqqan holda”, ayniqsa xomashyo hamda Osiyo va Yevropani bog‘lovchi muqobil yo‘llar nuqtai nazaridan yanada dolzarb bo‘lib qolmoqda. Bu haqda Lyuksemburgda bo‘lib o‘tgan Yevropa Ittifoqi—Qozog‘iston hamkorlik kengashining 19-yig‘ilishi yakunlari bo‘yicha YI xabarida qayd etilgan.
“Joriy geosiyosiy kontekst Osiyo va Yevropani bog‘laydigan yangi muqobil yo‘nalishlarga ehtiyoj borligini ko‘rsatdi va aloqada bo‘lish o‘zaro manfaatli strategik ahamiyatga ega sohaga aylandi”, — deyiladi xabarda.
Tomonlar 2020-yil 1-martdan kuchga kirgan Yevropa Ittifoqi va Qozog‘iston o‘rtasida Kengaytirilgan sheriklik va hamkorlik to‘g‘risidagi bitimning (EPCA) amalga oshirilishini tahlil qildi.
“YI ikki tomonlama munosabatlarga qat’iy sodiqligini bildirdi va EPCA doirasida, jumladan, muhim xomashyo bo‘yicha hamkorlikning yangi yo‘nalishlarini ochishga tayyorligini ko‘rsatdi”, — deyiladi press-relizda.
Yevropa Ittifoqi Qozog‘istonning birinchi savdo sherigi va respublika iqtisodiyotiga birinchi xorijiy investordir. Qozog‘iston Yevropa Ittifoqining Markaziy Osiyodagi asosiy savdo sherigi bo‘lib qolmoqda. 2021-yilda savdo balansi Qozog‘iston foydasiga 12 milliard yevroga yetdi.
Tomonlar o‘z pozitsiyalarini qadriyat mezonlari: adolatli boshqaruv, inson huquqlarini himoya qilish va fuqarolik jamiyati kabilar bo‘yicha solishtiradi.
“Yevropa Ittifoqi yanvar voqealari oqibatlaridan xavotir olib Qozog‘iston bilan o‘rtoqlashdi va xalqaro hamjamiyat e’tiboriga havola etiladigan to‘liq va mustaqil tergov jumladan, inson huquqlari buzilishini tekshirishning muhimligini ta’kidladi. Yevropa Ittifoqi Qozog‘iston boshlagan siyosiy islohotlar yo‘lini olqishladi”, — deya qayd etilgan hujjatda.
Yevropa Ittifoqi Qozog‘istonga quyosh va shamol kuchidan foydalanish orqali mamlakat energetika tizimini modernizatsiya qilish bo‘yicha o‘z tajribasi va ko‘magini taklif qildi. U Qozog‘istonni “mintaqaviy nufuzli o‘yinchi” sifatida tan oldi. Shuningdek, mintaqaviy xavfsizlik, jumladan, Afg‘onistondagi vaziyat, chegaralarni boshqarish va terrorizmga qarshi kurash masalalari muhokama qilindi.
Hamkorlik kengashiga Fransiya tashqi ishlar vaziri Katrin Kolonna boshchilik qildi. Qozog‘istondan esa bosh vazir o‘rinbosari, tashqi ishlar vaziri Muxtor Tilovberdi boshchiligidagi delegatsiya ishtirok etdi.
Izoh (0)