Prezident Qosim-Jo‘mart To‘qayev Qatar Iqtisodiy forumining maxsus sessiyasi — In Conversation with President Tokayev’da ishtirok etdi. Tadbirni Bloomberg televideniyesi boshlovchisi Manus Kranni olib bordi, deya yozadi Tengrinews nashri Akorda saytiga tayanib.
Savol-javob tarzida o‘tgan ochiq va samimiy muloqotda Qozog‘iston prezidenti xalqaro siyosatdagi dolzarb muammolarga, ayniqsa, Yevropada davom etayotgan geosiyosiy o‘zgarishlar, Rossiya-Ukraina mojarosi atrofidagi voqealar kontekstidagi bir qator savollarga javob berdi.
Rossiya-Ukraina mojarosini tinch yo‘l bilan hal qilish istiqbollari haqidagi savolga javob berar ekan, Qozog‘iston rahbari muzokaralar jarayonini davom ettirish muhimligini ta’kidladi. Qosim-Jo‘mart To‘qayevning so‘zlariga ko‘ra, ushbu mojaroni hal qilishda tomonlarning har birining harakati zarur. Shu bilan birga, u xalqaro hamjamiyatdagi kelishmovchiliklar va BMT Xavfsizlik Kengashining bu masalani hal qilishdagi zaifligiga ishora qildi.
“BMT hech qachon bunday noqulay vaziyatga tushib qolmagan. Hatto sovuq urush davrida ham BMT ancha birlashgan edi. Men BMT bilan kelajakda nima bo‘lishidan juda xavotirdaman. Shu bilan birga, ko‘p qirralilikka qat’iy ishonaman va xalqaro hamjamiyat yanada hamjihat bo‘lishi, birdamlik ko‘rsatishi va, albatta, har ikki davlatning tinchlikka kelishi uchun ijobiy ta’sir ko‘rsatishi kerakligiga to‘la ishonaman”, — dedi Qozog‘iston prezidenti.
To‘qayev boshlovchining Rossiyaga nisbatan misli ko‘rilmagan sanksiyalar siyosati sharoitida Qozog‘iston duch kelishi mumkin bo‘lgan iqtisodiy oqibatlarga oid savollariga ham javob bergan.
Ochiq muloqot chog‘ida jahon energetika bozoridagi mavjud vaziyat bilan bog‘liq global muammolar, xalqaro savdo xavotirlari ham muhokama qilingan.
Eslatib o‘tamiz, Qosim-Jo‘mart To‘qayev Qatar amirining shaxsiy taklifiga binoan Dohaga bordi. Qozog‘iston rahbari avvalroq Qatar iqtisodiy forumining ochilish marosimida ishtirok etdi, shuningdek, Qatar amiri Shayx Tamim bin Hamad at-Taniy bilan uchrashdi.
Izoh (0)