Қозоғистон ва Европа Иттифоқи ўртасидаги ҳамкорлик «янги геосиёсий контекстдан келиб чиққан ҳолда», айниқса хом ашё ҳамда Осиё ва Европани боғловчи муқобил йўллар нуқтаи назаридан янада долзарб бўлиб қолмоқда. Бу ҳақда Люксембургда бўлиб ўтган Европа Иттифоқи—Қозоғистон ҳамкорлик кенгашининг 19-йиғилиши якунлари бўйича ЕИ хабарида қайд этилган.
«Жорий геосиёсий контекст Осиё ва Европани боғлайдиган янги муқобил йўналишларга эҳтиёж борлигини кўрсатди ва алоқада бўлиш ўзаро манфаатли стратегик аҳамиятга эга соҳага айланди», — дейилади хабарда.
Томонлар 2020 йил 1 мартдан кучга кирган Европа Иттифоқи ва Қозоғистон ўртасида Кенгайтирилган шериклик ва ҳамкорлик тўғрисидаги битимнинг (EPCА) амалга оширилишини таҳлил қилди.
«ЕИ икки томонлама муносабатларга қатъий содиқлигини билдирди ва EPCА доирасида, жумладан, муҳим хом ашё бўйича ҳамкорликнинг янги йўналишларини очишга тайёрлигини кўрсатди», — дейилади пресс-релизда.
Европа Иттифоқи Қозоғистоннинг биринчи савдо шериги ва республика иқтисодиётига биринчи хорижий инвестордир. Қозоғистон Европа Иттифоқининг Марказий Осиёдаги асосий савдо шериги бўлиб қолмоқда. 2021 йилда савдо баланси Қозоғистон фойдасига 12 миллиард еврога етди.
Томонлар ўз позицияларини қадрият мезонлари: адолатли бошқарув, инсон ҳуқуқларини ҳимоя қилиш ва фуқаролик жамияти кабилар бўйича солиштиради.
«Европа Иттифоқи январь воқеалари оқибатларидан хавотир олиб Қозоғистон билан ўртоқлашди ва халқаро ҳамжамият эътиборига ҳавола этиладиган тўлиқ ва мустақил тергов жумладан, инсон ҳуқуқлари бузилишини текширишнинг муҳимлигини таъкидлади. Европа Иттифоқи Қозоғистон бошлаган сиёсий ислоҳотлар йўлини олқишлади», — дея қайд этилган ҳужжатда.
Европа Иттифоқи Қозоғистонга қуёш ва шамол кучидан фойдаланиш орқали мамлакат энергетика тизимини модернизация қилиш бўйича ўз тажрибаси ва кўмагини таклиф қилди. У Қозоғистонни «минтақавий нуфузли ўйинчи» сифатида тан олди. Шунингдек, минтақавий хавфсизлик, жумладан, Афғонистондаги вазият, чегараларни бошқариш ва терроризмга қарши кураш масалалари муҳокама қилинди.
Ҳамкорлик кенгашига Франция ташқи ишлар вазири Катрин Колонна бошчилик қилди. Қозоғистондан эса бош вазир ўринбосари, ташқи ишлар вазири Мухтор Тиловберди бошчилигидаги делегация иштирок этди.
Изоҳ (0)