Sanksiyalar tufayli Rossiyada SIM kartalar sotila boshladi. Deyarli butun dunyoda ular bepul

Eng yirik uyali aloqa operatorlari aloqa xizmatlarini ko‘rsatish bo‘yicha shartnoma tuzish chog‘ida SIM karta uchun to‘lov olishni boshladi. Bu haqda “Kommersant” xabar berdi.

Oldin operatorlar o‘z mijozlarini SIM karta bilan ta’minlash orqali subsidiyalagan. Oxirgi oylarda operatorlar uchun SIM kartalar narxi 3,5 baravarga oshdi, chunki ular G‘arb ishlab chiqaruvchilaridan xaridni to‘xtatib, Xitoy SIM kartalariga o‘tishga majbur bo‘ldi.

Vaziyat operatorlar abonent bazasining o‘sish sur’atlariga va internet bozorining rivojlanishiga salbiy ta’sir ko‘rsatishi mumkin.

Operatorlar aloqa xizmatlari uchun shartnoma tuzishda sim-karta uchun haq olishni boshladi. “MegaFon” va uning sho‘ba korxonasi Yota allaqachon 50 rubl miqdorida to‘lov joriy qilgan.

Vimpelcom (Beeline brendi) 21-iyundan boshlab xizmatni pulli qilishni rejalashtirmoqda, u ham 50 rubl narx qo‘ygan.

“MTS” 24-iyunda, “Tele2” esa 1-avgustda sotishni boshlaydi. Bozordagi yana bir manbaga ko‘ra, “MTS” allaqachon mamlakatning qator hududlarida SIM kartalar uchun to‘lov joriy etgan.

O‘zgarishlar kompaniyaning xizmat ko‘rsatish va aloqaning yuqori sifatini saqlab qolishdagi xarajatlarining oshishi bilan bog‘liq, — deb tushuntirildi “MegaFon”.

Ilgari operatorlar SIM kartaning narxini abonent bilan shartnoma tuzishda operator xizmatlaridan uzoq vaqt foydalanish orqali to‘lanadi deb o‘z zimmalariga olgan.

Endi bu foydasiz bo‘lib qoldi, chunki yangi SIM kartalar asosan vaqtinchalik foydalanish uchun sotib olinadi, — dedi TelecomDaily bosh direktori Denis Kuskov.

Iyun oyida operator uchun bitta SIM karta narxi o‘tgan yilning shu davriga nisbatan 250 foizga oshdi. Sentabrga borib identifikatsiya moduli narxining o‘sishi 420 foizga yetishi mumkin.

MForum tahlilchisi Aleksey Boykoning so‘zlariga ko‘ra, 24-fevralgacha rossiyalik operatorlar yirik global sotuvchilardan, jumladan Yevropa Gemalto, Giesecke+Devrient va boshqalardan sim-kartalarni xarid qilishni afzal ko‘rgan.

Ommaviy ishlab chiqarishni hisobga olgan holda, ularning narxi nisbatan past edi. Yevropalik ishlab chiqaruvchilarning SIM kartalarini sotib olish imkoniyatidan mahrum bo‘lgan operatorlar qimmatroq bo‘lgan osiyolik sotuvchilar bilan savdo qilishga majbur bo‘lmoqda, — deydi u.

Agar SIM kartalarni yetkazib berish bilan bog‘liq muammo yangi darajaga chiqsa, bu internet bozorining qisqarishiga olib kelishi mumkin.