Moliyaviy xizmatlarda 30,4 foiz o‘sish: O‘zbekistondagi xizmat ko‘rsatish sohalarida vaziyat qanday?

O‘zbekistonda 2022-yilning yanvar—may oylarida aholiga ko‘rsatilgan bozor xizmatlari hajmi o‘tgan yilga nisbatan 15,8 foizga oshdi. Bu haqda Davlat statistika qo‘mitasi xabar berdi.

Ko‘rsatilgan bozor xizmatlari hajmining o‘sishidagi asosiy omil — moliyaviy xizmatlar, aloqa va axborotlashtirish xizmatlari, transport xizmatlari , savdo xizmatlari o‘sgani hisoblanadi.

Joriy yilning o‘tgan 5 oyida moliyaviy xizmatlar hajmi 30,4 foizga o‘sib, 30,2 mlrd so‘mni tashkil etgan.

Moliyaviy xizmatlar tarkibiga sug‘urta va nafaqa ta’minoti bo‘yicha xizmatlardan tashqari moliyaviy xizmatlar (88,2 foiz), sug‘urta bo‘yicha xizmatlar (6,6 foiz) va yordamchi moliyaviy faoliyat (5,2 foiz) kiradi.

Yanvar—may oylarida aloqa va axborotlashtirish xizmatlari hajmi 24,2 foizga o‘sgan bo‘lib, qiymati 8,3 mlrd so‘mga yetgan.

Bunday xizmatlar tarkibiga telekommunikatsiya xizmatlari (66,7 foiz), kompyuterda dasturlashtirish bo‘yicha xizmatlar (16,1 foiz), noshirlik xizmatlari (4,6 foiz) va boshqa xizmatlar (12,6 foiz) kiradi.

O‘tgan 5 oyda transport xizmatlari hajmi 14,6 foizga o‘sib, 28,9 mlrd so‘mga yetgan.

Bunday xizmatlar tarkibiga avtomobil (54,6 foiz), havo xizmatlari (12,3 foiz), temiryo‘l (12,2 foiz), quvur (11,2 foiz) va yordamchi transport faoliyati (9,7 foiz) kiradi.

Yanvar—may oylarida savdo xizmatlari hajmi 8,6 foizga o‘sib, 32,8 mlrd so‘mga yetgan.

Bunday xizmatlar tarkibiga chakana savdo bo‘yicha xizmatlar (65,8 foiz), ulgurji savdo xizmatlari (26,6 foiz) va avtomobillar va mototsikllar ulgurji va chakana savdosi, jumladan, ularni ta’mirlash xizmatlarini qo‘shgan holda xizmatlar (7,6 foiz) kiradi.

Bundan tashqari yashash va ovqatlanish bo‘yicha xizmatlar (14,6 foiz), sog‘liqni saqlash sohasidagi xizmatlar (9,4 foiz) va ta’lim sohasidagi xizmatlarda (2,8 foiz) o‘sish kuzatilgan.