Ўзбекистонда 2022 йилнинг январь—май ойларида аҳолига кўрсатилган бозор хизматлари ҳажми ўтган йилга нисбатан 15,8 фоизга ошди. Бу ҳақда Давлат статистика қўмитаси хабар берди.
Кўрсатилган бозор хизматлари ҳажмининг ўсишидаги асосий омил — молиявий хизматлар, алоқа ва ахборотлаштириш хизматлари, транспорт хизматлари , савдо хизматлари ўсгани ҳисобланади.
Жорий йилнинг ўтган 5 ойида молиявий хизматлар ҳажми 30,4 фоизга ўсиб, 30,2 млрд сўмни ташкил этган.
Молиявий хизматлар таркибига суғурта ва нафақа таъминоти бўйича хизматлардан ташқари молиявий хизматлар (88,2 фоиз), суғурта бўйича хизматлар (6,6 фоиз) ва ёрдамчи молиявий фаолият (5,2 фоиз) киради.
Январь—май ойларида алоқа ва ахборотлаштириш хизматлари ҳажми 24,2 фоизга ўсган бўлиб, қиймати 8,3 млрд сўмга етган.
Бундай хизматлар таркибига телекоммуникация хизматлари (66,7 фоиз), компьютерда дастурлаштириш бўйича хизматлар (16,1 фоиз), ноширлик хизматлари (4,6 фоиз) ва бошқа хизматлар (12,6 фоиз) киради.
Ўтган 5 ойда транспорт хизматлари ҳажми 14,6 фоизга ўсиб, 28,9 млрд сўмга етган.
Бундай хизматлар таркибига автомобиль (54,6 фоиз), ҳаво хизматлари (12,3 фоиз), темир йўл (12,2 фоиз), қувур (11,2 фоиз) ва ёрдамчи транспорт фаолияти (9,7 фоиз) киради.
Январь—май ойларида савдо хизматлари ҳажми 8,6 фоизга ўсиб, 32,8 млрд сўмга етган.
Бундай хизматлар таркибига чакана савдо бўйича хизматлар (65,8 фоиз), улгуржи савдо хизматлари (26,6 фоиз) ва автомобиллар ва мотоцикллар улгуржи ва чакана савдоси, жумладан, уларни таъмирлаш хизматларини қўшган ҳолда хизматлар (7,6 фоиз) киради.
Бундан ташқари яшаш ва овқатланиш бўйича хизматлар (14,6 фоиз), соғлиқни сақлаш соҳасидаги хизматлар (9,4 фоиз) ва таълим соҳасидаги хизматларда (2,8 фоиз) ўсиш кузатилган.
Изоҳ (0)