Мерос орқали бойиган америкаликлар рейтинги эълон қилинди

Ўз активларини мерос қилиб олган йигирмата энг бой америкаликлар рўйхати тузилиб, уларнинг умумий бойлиги 568 млрд долларга баҳоланди. Бу ҳақда Forbes хабар берди.

Биринчи ўринда 59,6 млрд доллар бойлиги билан Чарльз Кох турибди. У акаси Дэвид билан бирга отаси Фреднинг Koch Industries компаниясини мерос қилиб олган. Дастлаб у нефтни қайта ишлашга ихтисослашган бўлса, кейинчалик фаолият доирасини кенгайтирган.

Рейтингда Чарльз Кох билан биринчи ўринни акасининг беваси — Юлия Кох эгаллайди. Дэвид Кох вафотидан кейин у ва унинг уч фарзанди Koch Industries компаниясининг 42 фоизини мерос қилиб олган. Юлиянинг бойлиги 59,6 млрд долларга баҳоланган.

Рейтингда учинчи ўринни Жим Уолтон эгаллади, унинг бойлиги 58,3 млрд долларни ташкил этади. У 1962 йилда отаси томонидан яратилган Walmart чакана савдо тармоғидаги 13 фоиз улуш меросхўри.

Тўртинчи ўринда Walmart асосчисининг қизи Элис 57,5 ​​млрд доллар бойлик билан турибди.У ҳеч қачон отасининг компаниясида юқори лавозимларда ишламаган, у зотдор отларни боқиш ва санъат асарлари йиғишни яхши кўради.

Биринчи бешликка Сем Уолтоннинг яна бир ўғли Роб киради. 1992 йилда отасининг вафотидан кейин у 20 йилдан ортиқ вақт давомида Walmart компаниясининг бош директори бўлиб ишлаган ва унинг бойлиги 57,2 млрд долларга тенг.

Рейтингда олтинчи ўринни Amazon асосчиси Жефф Безос билан ажрашганидан сўнг миллиардерлар рўйхатига кирган Маккензи Скотт эгаллади. Унинг бойлиги 30,7 млрд долларга баҳоланган. Рейтингда у бойлигини мерос орқали эмас, балки ажралиш натижасида олган ягона шахсдир.

Кейинги ўринларда Жон Марс (29,7 млрд доллар) ва Жаклин Марс (25,1 млрд доллар) бўлди. Конфет, сақич, қандолат маҳсулотлари ва уй ҳайвонлари учун озиқ-овқат ишлаб чиқаришга ихтисослашган Маrs компаниясига 1911 йилда уларнинг бобоси Фрэнк Марс асос солган.

Жон ва Жаклин 1999 йилда отаси Форест вафотидан кейин компаниянинг 1/3 қисмини мерос қилиб олган.

Рўйхатнинг тўққизинчи ўрнида марҳум эрининг қимор империясининг вориси Мириам Аделсон (25,1 млрд). У Сингапур ва Макаодаги казиноларни ҳам бошқарадиган Лас-Вегас Сандс компаниясининг 52 фоиз улушига эга.

Ўнликни Леонард Лаудер 20,7 млрд доллар бойлиги билан якунлади. Леонард ота-онаси Эсте ва Жозеф Лаудер томонидан асос солинган Estée Lauder косметика компаниясининг 20 фоиз улушига эга. У 30 йил давомида компаниянинг бош директори бўлган, ҳозир эса фахрий директор лавозимини эгаллаб турибди.

Аввалроқ дунёнинг энг бой одамлари йил бошидан бери 1,4 трлн доллар йўқотгани ҳақида хабар берилганди.