SpaceX kompaniyasi rahbari Ilon Maskning xatti-harakati tanqid qilingan ochiq xat loyihasini ishlab chiqish va tarqatishda ishtirok etgan bir necha xodimlar ishdan bo‘shatildi. Bu haqda SpaceX’ning vaziyatdan xabardor bo‘lgan uch xodimiga tayanib, The New York Times xabar bermoqda.
O‘tgan chorshanba kuni Maskni tanqid qiluvchi xat xodimlar orasida tarqala boshladi. Maktub mualliflari SpaceX rahbarining Twitter’dagi ommaviy xulq-atvori va ko‘p sonli postlari “ko‘pincha chalg‘ituvchi va uyatli” ekanligini ta’kidlagan.
Xodimlar kompaniya rahbari Ilon Maskni “zararli xatti-harakatni jamoatchilik tomonidan qoralashga” va “qilgan barcha nomaqbul ishlariga javob berishga” chaqirishgan. Payshanba kuni tushdan keyin maktub mualliflarining ba’zilari ishdan bo‘shatildi.
Bu haqiqatni SpaceX prezidenti va kompaniya direktori Gvin Shotuellning The New York Times qo‘liga o‘tgan maktubi ham tasdiqlaydi. U kompaniya vaziyatni o‘rgangani va ushbu xat bilan bog‘liq bir necha kishi ishdan bo‘shatilganini aytdi.
Ishdan bo‘shatilgan xodimlarning aniq soni ko‘rsatilmagan.
Avvalroq Ilon Mask “kriptopiramida” yaratishda ayblanib, sudga berilgan edi.
Izoh (0)