SpaceX ходимлари Илон Маскни танқид қилгани учун ишдан бўшатилган

SpaceX компанияси раҳбари Илон Маскнинг хатти-ҳаракати танқид қилинган очиқ хат лойиҳасини ишлаб чиқиш ва тарқатишда иштирок этган бир неча ходимлар ишдан бўшатилди. Бу ҳақда SpaceX’нинг вазиятдан хабардор бўлган уч ходимига таяниб, The New York Times хабар бермоқда.

Ўтган чоршанба куни Маскни танқид қилувчи хат ходимлар орасида тарқала бошлади. Мактуб муаллифлари SpaceX раҳбарининг Twitter’даги оммавий хулқ-атвори ва кўп сонли постлари «кўпинча чалғитувчи ва уятли» эканлигини таъкидлаган.

Ходимлар компания раҳбари Илон Маскни «зарарли хатти-ҳаракатни жамоатчилик томонидан қоралашга» ва «қилган барча номақбул ишларига жавоб беришга» чақиришган. Пайшанба куни тушдан кейин мактуб муаллифларининг баъзилари ишдан бўшатилди.

Бу ҳақиқатни SpaceX президенти ва компания директори Гвин Шотуэллнинг The New York Times қўлига ўтган мактуби ҳам тасдиқлайди. У компания вазиятни ўргангани ва ушбу хат билан боғлиқ бир неча киши ишдан бўшатилганини айтди.

Ишдан бўшатилган ходимларнинг аниқ сони кўрсатилмаган.

Аввалроқ Илон Маск «криптопирамида» яратишда айбланиб, судга берилган эди.