Jahon sog‘liqni saqlash tashkiloti (JSST) maymunchechak avj olishi bilan bog‘liq vaziyat global sog‘liqni saqlash uchun qanchalik xavfliligini baholash maqsadida kelasi hafta favqulodda qo‘mita yig‘ilishini o‘tkazadi. Bu haqda tashkilot rahbari Tedros Adanom Gebreyesus ma’lum qildi, deb yozadi “RBK”.
Uning so‘zlariga ko‘ra, hozir tashkilotga 1,6 mingta tasdiqlangan kasallanish holatlari haqida ma’lum. Bundan tashqari, yil boshidan buyon 39 ta mamlakatdagi 1,5 mingta kasallanish va 72 ta o‘lim holatlari haqida taxminiy ma’lumotlar olingan.
Gebreyesus fikricha, himoya choralarini kuchaytirish haqida o‘ylab ko‘rish kerak, chunki “virus o‘zini noodatiy tarzda tutmoqda”, va xalqaro koordinatsiyaga zaruriyat bor. “Biz vaziyat nazoratdan chiqib ketguncha kutib o‘tirishni istamaymiz”, — deya qo‘shimcha qildi JSSTning Afrikadagi favqulodda vaziyatlar bo‘yicha direktori Ibragima Sos-Foll.
Shu bilan birga, Gebreyesus qayd etishicha, JSST ayni vaqtda maymunchechakka qarshi ommaviy emlash talab etilmaydi, degan fikrda.
Tashkilot ma’lumotlariga ko‘ra, maymunchechak — asosan nam tropik o‘rmonlar o‘sib, odatda virus tashuvchilari bo‘lib hisoblanadigan hayvonlar yashaydigan Markaziy va G‘arbiy Afrika mamlakatlarida uchraydigan kamyob virusli kasallik. Ba’zan virus boshqa mamlakatlarda maymunchechak bo‘yicha endemik bo‘lgan hududlarda bo‘lib qaytgan odamlarda aniqlanadi. Odamlar orasidagi ilk kasallanish holatlari 1970-yilda Kongo Demokratik Respublikasi (o‘sha vaqtda — Zair)da aniqlangan. Afrikadan tashqaridagi ilk holatlar 2003-yilda AQSHda qayd etilgan. So‘nggi yirik avj olish Nigeriyada 2017-yilda sodir bo‘lgan, ammo 2018—2019-yillarda ushbu chechakka chalinganlar Buyuk Britaniya, Isroil va Singapurda aniqlangan edi.
Bu yil Afrikadan tashqarida maymunchechak bilan kasallanish holatlari haqida birinchi bo‘lib Buyuk Britaniya may boshida xabar berdi. Virus Nigeriyadan uchib kelgan samolyot yo‘lovchisida aniqlandi. Keyinroq ushbu virusga chalinish hollari haqida boshqa mamlakatlar, shu jumladan, Avstraliya, Belgiya, Kanada, Fransiya, Germaniya, Italiya, Niderlandiya, Shvetsiya, AQSH ma’lum qilishni boshladi.
O‘zbekiston Sanitariya-epidemiologik osoyishtalik va jamoat salomatligi xizmati boshlig‘i o‘rinbosari Nurmat Otabekov 23-may kuni O‘zbekistonda maymunchechak qayd etilmagani haqida aytib o‘tgandi. “Ayni paytda JSST tavsiyalaridan kelib chiqib bu infeksiyaning yurtimizga kirib kelmasligi uchun zarur choralarni ko‘ryapmiz”, — degandi u. Keyinroq u O‘zbekistonga maymunchechak kirib kelishi ehtimoli mavjud, lekin tarqalish xavfi juda pastligini ma’lum qilgandi.
Izoh (0)