Жаҳон соғлиқни сақлаш ташкилоти (ЖССТ) маймунчечак авж олиши билан боғлиқ вазият глобал соғлиқни сақлаш учун қанчалик хавфлилигини баҳолаш мақсадида келаси ҳафта фавқулодда қўмита йиғилишини ўтказади. Бу ҳақда ташкилот раҳбари Тедрос Аданом Гебрейесус маълум қилди, деб ёзади «РБК».
Унинг сўзларига кўра, ҳозир ташкилотга 1,6 мингта тасдиқланган касалланиш ҳолатлари ҳақида маълум. Бундан ташқари, йил бошидан буён 39 та мамлакатдаги 1,5 мингта касалланиш ва 72 та ўлим ҳолатлари ҳақида тахминий маълумотлар олинган.
Гебрейесус фикрича, ҳимоя чораларини кучайтириш ҳақида ўйлаб кўриш керак, чунки «вирус ўзини ноодатий тарзда тутмоқда», ва халқаро координацияга зарурият бор. «Биз вазият назоратдан чиқиб кетгунча кутиб ўтиришни истамаймиз», — дея қўшимча қилди ЖССТнинг Африкадаги фавқулодда вазиятлар бўйича директори Ибрагима Сос-Фолл.
Шу билан бирга, Гебрейесус қайд этишича, ЖССТ айни вақтда маймунчечакка қарши оммавий эмлаш талаб этилмайди, деган фикрда.
Ташкилот маълумотларига кўра, маймунчечак — асосан нам тропик ўрмонлар ўсиб, одатда вирус ташувчилари бўлиб ҳисобланадиган ҳайвонлар яшайдиган Марказий ва Ғарбий Африка мамлакатларида учрайдиган камёб вирусли касаллик. Баъзан вирус бошқа мамлакатларда маймунчечак бўйича эндемик бўлган ҳудудларда бўлиб қайтган одамларда аниқланади. Одамлар орасидаги илк касалланиш ҳолатлари 1970 йилда Конго Демократик Республикаси (ўша вақтда — Заир)да аниқланган. Африкадан ташқаридаги илк ҳолатлар 2003 йилда АҚШда қайд этилган. Сўнгги йирик авж олиш Нигерияда 2017 йилда содир бўлган, аммо 2018—2019 йилларда ушбу чечакка чалинганлар Буюк Британия, Исроил ва Сингапурда аниқланган эди.
Бу йил Африкадан ташқарида маймунчечак билан касалланиш ҳолатлари ҳақида биринчи бўлиб Буюк Британия май бошида хабар берди. Вирус Нигериядан учиб келган самолёт йўловчисида аниқланди. Кейинроқ ушбу вирусга чалиниш ҳоллари ҳақида бошқа мамлакатлар, шу жумладан, Австралия, Бельгия, Канада, Франция, Германия, Италия, Нидерландия, Швеция, АҚШ маълум қилишни бошлади.
Ўзбекистон Санитария-эпидемиологик осойишталик ва жамоат саломатлиги хизмати бошлиғи ўринбосари Нурмат Отабеков 23 май куни Ўзбекистонда маймунчечак қайд этилмагани ҳақида айтиб ўтганди. «Айни пайтда ЖССТ тавсияларидан келиб чиқиб бу инфекциянинг юртимизга кириб келмаслиги учун зарур чораларни кўряпмиз», — деганди у. Кейинроқ у Ўзбекистонга маймунчечак кириб келиши эҳтимоли мавжуд, лекин тарқалиш хавфи жуда пастлигини маълум қилганди.
Изоҳ (0)