Ukraina prezidenti Vladimir Zelenskiy Germaniya kansleri Olaf Sholsning Kiyev va Moskva bilan munosabatlarda “muvozanat saqlash”ga urinishlarini tanqid qildi.
“U (Shols) va uning hukumati ular uchun kim birinchi o‘rinda ekani haqida bir qarorga kelishi kerak: Ukraina va Rossiya bilan munosabatlarda muvozanat saqlashga urinish bo‘lmasligi lozim”, — dedi Zelenskiy.
Ukraina prezidenti, shuningdek, kanslerni Ukraina bilan munosabatlarda aniqroq bo‘lishga chaqirdi.
Davlat rahbarining so‘zlariga ko‘ra, Berlinning Kiyev va Moskva bilan aloqalarni Berlinga imkon qadar kamroq zarar yetkazadigan tarzda davom ettirish haqidagi yondashuvi noto‘g‘ri.
Sholsning Ukrainaga kelishi ehtimolini izohlar ekan, Zelenskiy u faqat suratga tushish bilan cheklanib qolmasligi lozim, dedi. Prezidentning so‘zlariga ko‘ra, Germaniya hukumati rahbari tashrif chog‘ida Ukrainani qo‘llab-quvvatlash va uning Yevropa Ittifoqiga nomzod maqomini olishini tezlashtirish to‘g‘risida e’lon qilishi kerak. Zelenskiy, shuningdek, Rossiyaga qarshi sanksiyalarning kuchaytirilishiga umid qilmoqda.
Izoh (0)