AQSH prezidenti Jo Bayden Belarus hukumatiga qarshi bir tomonlama sanksiyalar rejimini uzaytirdi. Tegishli hujjat Oq uy saytida nashr qilindi.
“Belarusga nisbatan milliy favqulodda holat tartibini yana bir yilga uzaytiraman”, — deyiladi Bayden 13-iyun kuni imzolagan hujjat matnida. Hujjat nusxasi Kongressga yuborilgan.
Qayd etilishicha, Belarus hukumatidagi ayrim kishilarning xatti-harakatlari va siyosati, Belarus rejimining zararli faoliyati va uzoq yillik suiiste’molliklar AQSH milliy xavfsizligi va tashqi siyosatiga g‘ayrioddiy va favqulodda xavf tug‘dirishda davom etmoqda. Bu esa Baydenning sanksiyalarni uzaytirish to‘g‘risidagi qaroriga sabab bo‘lgan.
Avvalroq The Wall Street Journal AQSH oziq-ovqat inqirozini hal qilish uchun Belarusdan sanksiyalarni olib tashlamoqchi ekani haqida yozgandi. Mamlakat bu qaror Belarus prezidenti Aleksandr Lukashenkoning pozitsiyasini yumshatishini hamda Ukraina g‘allasining Belarus hududi orqali eksport qilinishiga yo‘l ochishini taxmin qilgan.
Izoh (0)