Зеленский Шольцни Украина ва Россия ўртасида мувозанат сақлашга урингани учун танқид қилди

Украина президенти Владимир Зеленский Германия канцлери Олаф Шольцнинг Киев ва Москва билан муносабатларда «мувозанат сақлаш»га уринишларини танқид қилди.

«У (Шольц) ва унинг ҳукумати улар учун ким биринчи ўринда экани ҳақида бир қарорга келиши керак: Украина ва Россия билан муносабатларда мувозанат сақлашга уриниш бўлмаслиги лозим», — деди Зеленский.

Украина президенти, шунингдек, канцлерни Украина билан муносабатларда аниқроқ бўлишга чақирди.

Давлат раҳбарининг сўзларига кўра, Берлиннинг Киев ва Москва билан алоқаларни Берлинга имкон қадар камроқ зарар етказадиган тарзда давом эттириш ҳақидаги ёндашуви нотўғри.

Шольцнинг Украинага келиши эҳтимолини изоҳлар экан, Зеленский у фақат суратга тушиш билан чекланиб қолмаслиги лозим, деди. Президентнинг сўзларига кўра, Германия ҳукумати раҳбари ташриф чоғида Украинани қўллаб-қувватлаш ва унинг Европа Иттифоқига номзод мақомини олишини тезлаштириш тўғрисида эълон қилиши керак. Зеленский, шунингдек, Россияга қарши санкцияларнинг кучайтирилишига умид қилмоқда.