Xitoydagi restoranlardan birida ovqatlanib o‘tirgan ayollar bir guruh erkaklar hujumiga uchradi, deb xabar bermoqda Sky News. Voqea aks etgan video internetda ommalashib ketdi va jamoatchilikning noroziligiga sabab bo‘ldi.
Kuzatuv kameralariga muhrlangan kadrlarda shimoliy Xebey provinsiyasidagi Tashan shahrida joylashgan barbekyu restoranida 10-iyun, juma kuni tonggi 2:40 da to‘rt ayol ovqatlanib o‘tirgan stolga erkaklardan biri yaqinlashib, bir ayolga qo‘l tekkizganini ko‘rish mumkin. Ayol bir necha marta qarshilik ko‘rsatgan, erkak unga tarsaki tushirganidan keyin esa u ham urishni boshlagan va shu tariqa janjal kelib chiqqan.
Shundan keyin bir guruh erkaklar restoranga kirib, ayol va u bilan birga o‘tirgan dugonalariga hujum qilgan, ularni yerga yiqitib, tepgan va ularga stul uloqtirgan.
Restoran tashqarisidagi kameralardan olingan tasvirlarda hujum qilgan shaxslar erkakka moyillik ko‘rsatmagan ayolni sudrab chiqarib, do‘pposlaganini, o‘tkinchilar esa buni tomosha qilib turganini ko‘rish mumkin.
Yuzi shishib ketgan va qonga belangan holda zambilda o‘tirgan ayol surati, shuningdek, kuzatuv kamerasi videotasvirlari internetda tarqalib ketdi va foydalanuvchilar o‘rtasida keng norozilikka uchradi.
Hukumat bayonotiga ko‘ra, 11-iyun, shanba kuni to‘qqiz nafar gumonlanuvchi hibsga olingan.
Ayollarning ikki nafari hayot uchun xavf tug‘dirmaydigan jarohatlar olib, kasalxonaga tushgan. Qolgan ikkisi yengil shikastlangan.
“Demak, uydan tashqarida ovqatlanish hozir shunchalik xavflimi, qayerga borsak, o‘zimiz bilan erkak kishilarni olib yurishimiz kerakmi? Bu erkaklarning banditlardan hech qanday farqi yo‘q”, — deb yozdi Weibo foydalanuvchilaridan biri.
Ijtimoiy tarmoqlar foydalanuvchilari hujumni qoraladi va Tanshan politsiyasini gumonlanuvchilarni hibsga olish jarayoni sekin kechgani uchun tanqid qildi, voqea esa Xitoyda ayollarga munosabat masalasini yana ko‘tardi.
Izoh (0)