Қозоғистоннинг собиқ президенти Нурсултон Назарбоев Москвада Россия президенти Владимир Путин билан учрашди, деб хабар берди қозоғистонлик сиёсатчининг матбуот хизмати.
Томонлар икки давлат ўртасидаги муносабатларнининг 30 йиллиги шарафига бир-бирини табриклади. «Қозоғистон ва Россия ўртасидаги ҳамкорлик тенг ҳуқуқли мулоқот асосида ривожланиб бораётгани қайд этилди», — дея қўшимча қилди матбуот хизмати.
Бундан ташқари, Путин ва Назарбоев ўрнатилган дўстона алоқалар бундан буён ҳам давом этишига ишонч билдириб, бир-бирига мустаҳкам соғлик ва фаровонлик тилади.
Кремль учрашув ҳақида эълон қилмаган.
Бу Назарбоев ва Путиннинг Қозоғистонда конституция бўйича референдум ўтказилганидан кейинги илк расмий учрашувидир. Асосий қонундан Назарбоевнинг ҳуқуқий мақоми ва ваколатлари ҳақидаги қоидалар чиқариб ташланди, президентлик муддатлари сонига ҳам чекловлар киритилди. Бундан ташқари, Назарбоевнинг элбаси, яъни халқ етакчиси мақоми истисно қилинди. Шу билан бирга, янги конституция матнида Назарбоев «мустақил давлат асосчиси» сифатида қолди.
Назарбоевнинг сиёсатдан четлаштирилиши Қозоғистонда 2022 йил январида бўлиб ўтган норозилик намойишларида билдирилган талаблардан бири эди. Тўполон пайтида Олмаота аэропорти ва маъмурият бинолари тортиб олинди, дўконлар талон-тарож қилинди. Бош прокуратура маълумотларига кўра, намойишлар натижасида 230 киши ҳалок бўлган. Намойишлар бостирилгач, биринчи президентнинг уч куёви, унинг жияни ва бошқа қариндошлари мансабларини, Назарбоевнинг ўзи эса Қозоғистон Халқ Ассамблеяси ва Хавфсизлик Кенгашига умрбод раислик қилишдан маҳрум бўлди. Бундан ташқари, у кейинчалик номи «Amanat» деб ўзгартирилган ҳукмрон «Нур Отан» партиясининг раҳбари лавозимидан четлатилди.
Назарбоев Қозоғистонни қарийб 30 йил бошқарган. У 2019 йилнинг 20 мартида президентликдан кетган.
Изоҳ (0)