Ukrainada tinchlikka erishish imkoni bor, masala faqat buning bahosida — mamlakat ushbu tinchlik uchun qancha hududidan, qancha erkinlik va demokratiyasidan voz kechishga tayyorligida, dedi NATO bosh kotibi Yens Stoltenberg Xelsinkidagi matbuot anjumanida. Bu haqda “RBK” xabar bermoqda.
“Ukrainada tinchlikka erishish mumkin. Masala shundaki, buning bahosi qanaqa bo‘ladi? U tinchlik uchun hududining, mustaqilligining, erkinligining, demokratiyasining qanchasini berishga tayyor? Bu esa juda qiyin ma’naviy dilemma (ikkilanish, taraddud)”, — deya qayd etdi u.
Stoltenberg ta’kidlashicha, harbiy harakatlar muzokaralar stoli atrofida tugashi kerak va NATO Ukrainaga Rossiya bilan muzokaralarda eng kuchli pozitsiyani egallashda yordam berishga tayyor.
Uning eslatishicha, Shimoliy Atlantika alyansi Ukrainadagi nizo tomonlaridan biri emas. Biroq, uning so‘zlariga ko‘ra, NATO qarshisida ikkita vazifa turibdi: Kiyevni qo‘llab-quvvatlashda davom etish va bu mamlakatdan tashqarida jangovar harakatlar kuchayishiga yo‘l qo‘ymaslik.
NATO bosh kotibi fikricha, Rossiya prezidenti Vladimir Putinning ambitsiyalari “Ukraina chegarasidan chiqadi”. Stoltenberg eslatishicha, Moskva tomonidan 2021-yil dekabrida AQSH va NATOga taqdim etilgan xavfsizlik kafolatlari bo‘yicha takliflarda nafaqat Ukraina, balki alyansga taalluqli bandlar ham bo‘lgan.
“Ushbu talablar Xelsinki kelishuvlarida qayd etilgan Yevropa xavfsizligi tartibini to‘liq qayta ko‘rib chiqish bilan teng. Bitimlarning bosh tamoyillaridan biri har bir xalqning o‘z yo‘lini o‘zi tanlash huquqi hisoblanadi”, — dedi Stoltenberg.
2021-yil dekabrida, G‘arb Rossiyani Ukrainaga hujumlarga tayyorlanishda ayblayotgan bir paytda, Moskva Vashingtonga xavfsizlik kafolatlari bo‘yicha takliflar yubordi. Rossiya NATOning sharqqa kangaymasligini va uning tarkibiga sobiq SSSR respublikalari, shu jumladan, Ukraina va Gruziyani qabul qilishdan bosh tortishni talab qilgandi.
Yanvarda Rossiya ushbu masala bo‘yicha AQSH, NATO va YeXHT bilan uchta raundda muzokaralar o‘tkazdi. Biroq tomonlar Rossiya tomoni uchun asosiy bo‘lgan bandlar bo‘yicha bitimga kela olmadi.
May oxirida Ukraina prezidenti ofisi rahbarining maslahatchisi Mixail Podolyak ba’zi G’arb siyosatchilari Kiyevga Rossiya harbiy operatsiyasini to‘xtatish uchun Moskvaga o‘z hududining bir qismini berishni taklif qilayotganini ma’lum qildi. U Ukraina bunday muhokamalarda qatnashmasligini ta’kidladi.
Ukraina tashqi ishlar vaziri Dmitriy Kuleba ham Kiyev hududning bir qismidan voz kechmasligi haqida aytgandi. Kiyev Moskva bilan yarashishning yomon tomonini ko‘rmayapti, lekin bu “Ukraina hududi ozod bo‘lishiga” olib kelishi kerak, dedi u.
Ukraina prezidenti Vladimir Zelenskiy, o‘z navbatida, Ukraina 24-fevral kuni Rossiya harbiy operatsiyasi boshlanganidan keyin boy berilgan hududlarini qaytarib olganidan keyin u bilan muzokaralarni boshlashini ma’lum qildi.
Maxsus operatsiya boshlanganidan ekyin bir hafta o‘tib, 2-mart kuni Rossiya harbiylari Xersonni egallab oldi, 15-martga kelib esa butun Xerson viloyati Rossiya nazorati ostiga o‘tdi. Keyinroq Rossiya Mudofaa vazirligi Zaporojye viloyatining janubi bosib olinganini ma’lum qildi.
Izoh (0)