Qisman neft embargosini ma’qullash va bir nechta banklarni SWIFT’dan uzib qo‘yishdan tashqari, Shveysariya hukumati Rossiya va Belarusning “100 dan ortiq jismoniy shaxs va tashkilotlarini” sanksiyalar ro‘yxatiga kiritdi.
Shveysariya Yevropa Ittifoqining Rossiyaga qarshi sanksiyalarning oltinchi paketini, jumladan, Rossiya neftini yetkazib berishga qisman embargo qo‘yishni qo‘llab-quvvatlaydi, deya xabar beradi mamlakat Federal kengashi (hukumati) sayti.
“Federal kengash 10-iyun kuni Rossiya va Belarusga qarshi Yevropa Ittifoqining yangi sanksiyalarini ma’qullash to‘g‘risida qaror qabul qildi va Iqtisodiyot departamentiga farmonni Ukrainadagi vaziyat bilan bog‘liq qadamlarga moslashtirishni topshirdi”, — deyiladi xabarda.
Bundan tashqari, Shveysariya “moliyaviy sanksiyalar va yana 100 kishining mamlakatga kirishini taqiqlovchi” sanskiylarni ham paketga kiritdi. Taqiqlangan insonlar orasida Rossiya va Belarus fuqarolari — harbiylar, siyosatchilar, tadbirkorlar, va “dezinformatsiya tarqatishda ishtirok etgan shaxslar” bor.
“Shu tariqa, Shveysariyaning sanksiyalarga kiritilgan jismoniy va yuridik shaxslar ro‘yxati Yevropa Ittifoqi ro‘yxati bilan bir xil” – deb yozadi hukumat.
Yevropa Ittifoqi 3-iyun kuni Rossiya va Belarusga qarshi oltinchi sanksiyalar paketini tasdiqladi. Rossiyaga qarshi sanksiyalar doirasida YI Rossiya neftining importiga qisman embargo qo‘yish, yana uchta Rossiya bankini SWIFT tizimidan uzib qo‘yishga qaror qildi. Bular: Sberbank, Moskva kredit banki va Rosselxozbank. Shuningdek, sanksiyalar paketida jismoniy va yuridik shaxslarga nisbatan cheklov choralarini kengaytirish ham ko‘zda tutilgan, biroq ularning ro‘yxati hali taqdim etilmagan.
Izoh (0)