Yaponiya hukumati COVID-19 pandemiyasi sabab xorijiy sayyohlar uchun qo‘yilgan cheklovlarni yumshatdi va mamlakatga kirish uchun berilgan arizalarni qabul qilishni boshladi, deya xabar beradi Associated Press nashri.
Yaponiya Turizm agentligi 10-iyun, juma kuni mamlakat 98 davlat, jumladan, Rossiya, AQSH, Buyuk Britaniya, Xitoy va Janubiy Koreyadan sayyohlarning kirish arizalarini qabul qila boshlaganini ma’lum qildi. Mamlakatga birinchi sayyohlar iyul oyida kelishi kutilmoqda.
Hozircha mamlakatga tashrif buyurish faqat uyushgan turistik guruhlarga ruxsat etilgan va mamlakat rasmiylarining fikricha, chet ellik mehmonlar Yaponiyaga yakka tartibda kelishlari uchun biroz vaqt kerak bo‘ladi.
Qoidalarga ko‘ra, sayyohlar ko‘p vaqt niqob taqib yurishi shart. Shuningdek, ular COVID-19 bilan kasallangan taqdirda, tibbiy xarajatlarni qoplash uchun sug‘urta sotib olishlari kerak bo‘ladi. Bitta turistik guruhdagi odamlar soni bo‘yicha hech qanday cheklovlar yo‘q, ammo sayohat davomida guruhga gid hamrohlik qilishi lozim.
Yaponiyada xalqaro turizmning qisman tiklanishi may oyining oxirida o‘tkazilgan tajribaga asoslangan tavsiyalarga mos keladi. Ushbu tajribada 50 ga yaqin kishi, asosan Avstraliya, Singapur, Tailand va AQSHdan kelgan sayyohlik agentliklari xodimlari ishtirok etgandi.
Joriy yilning boshida Yaponiya o‘zining qattiq chegara nazorati sabab ksenofobiyada (begona va notanish narsalarga nisbatan murosasizlik) ayblangan, shundan so‘ng mamlakat hukumati cheklovlarni asta-sekin yumshata boshlagandi. 1-iyun kuni mamlakat hukumati Yaponiya fuqarolari, chet ellik talabalar va ishbilarmon sayohatchilarni hisobga olgan holda Yaponiyaga chet el fuqarolari kirishning ruxsat etilgan sonini kuniga 20 ming kishiga oshirdi.
Izoh (0)