Қисман нефть эмбаргосини маъқуллаш ва бир нечта банкларни SWIFT’дан узиб қўйишдан ташқари, Швейцария ҳукумати Россия ва Беларуснинг «100 дан ортиқ жисмоний шахс ва ташкилотларини» санкциялар рўйхатига киритди.
Швейцария Европа Иттифоқининг Россияга қарши санкцияларнинг олтинчи пакетини, жумладан, Россия нефтини етказиб беришга қисман эмбарго қўйишни қўллаб-қувватлайди, дея хабар беради мамлакат Федерал кенгаши (ҳукумати) сайти.
«Федерал кенгаш 10 июнь куни Россия ва Беларусга қарши Европа Иттифоқининг янги санкцияларини маъқуллаш тўғрисида қарор қабул қилди ва Иқтисодиёт департаментига фармонни Украинадаги вазият билан боғлиқ қадамларга мослаштиришни топширди», — дейилади хабарда.
Бундан ташқари, Швейцария «молиявий санкциялар ва яна 100 кишининг мамлакатга киришини тақиқловчи» санскийларни ҳам пакетга киритди. Тақиқланган инсонлар орасида Россия ва Беларусь фуқаролари — ҳарбийлар, сиёсатчилар, тадбиркорлар, ва «дезинформация тарқатишда иштирок этган шахслар» бор.
«Шу тариқа, Швейцариянинг санкцияларга киритилган жисмоний ва юридик шахслар рўйхати Европа Иттифоқи рўйхати билан бир хил» – деб ёзади ҳукумат.
Европа Иттифоқи 3 июнь куни Россия ва Беларусга қарши олтинчи санкциялар пакетини тасдиқлади. Россияга қарши санкциялар доирасида ЕИ Россия нефтининг импортига қисман эмбарго қўйиш, яна учта Россия банкини SWIFT тизимидан узиб қўйишга қарор қилди. Булар: Сбербанк, Москва кредит банки ва Росселхозбанк. Шунингдек, санкциялар пакетида жисмоний ва юридик шахсларга нисбатан чеклов чораларини кенгайтириш ҳам кўзда тутилган, бироқ уларнинг рўйхати ҳали тақдим этилмаган.
Изоҳ (0)